Tíu þúsund Íslendingar á AdultFriendFinder

Þórgnýr Einar Albertsson skrifar 16. nóvember 2016 05:00

Notandi AdultFriendFinder við tölvuna. Myndin er sviðsett. vísir/ernir

Að minnsta kosti 10.459 Íslendingar eru skráðir á skyndikynnasíðuna AdultFriendFinder. Svo margir notendur eru í það minnsta skráðir á síðuna með netfangi sem endar á .is. Þar af eru flestir sem hafa skráð sig með netfangi sem endar á @visir.is eða 3.605 talsins.

Upp komst um stærðarinnar tölvuárás á gagnagrunn síðunnar, sem og vefmyndavélaklámsíðnanna iCams og Stripshow auk annarra sambærilegra síðna á sunnudag þegar vefsíðan Leaked Source sagðist hafa notendaupplýsingar 412 milljóna notenda undir höndum, þar af 340 milljóna notenda AdultFriendFinder. Til samanburðar var upplýsingum 32 milljóna notenda Ashley Madison stolið í fyrra, þar af voru 128 með íslensk netföng.

Leaked Source segist hafa fengið gögnin frá nafnlausum tölvuþrjótum og hyggst vefsíðan ekki birta upplýsingarnar.

Langflest netfanganna og lykilorðanna eru frá AdultFriendFinder sem auglýsir sig sem „stærsta samfélag kynlífs- og makaskiptaáhugamanna í heiminum“.

Leaked Source svaraði fyrirspurn Fréttablaðsins og sendi lista af algengustu netfangaendingum sem enda á .is. Listinn nær bara yfir netföng skráð á AdultFriendFinder og voru netföngin 10.459 talsins eins og áður segir. Fréttablaðið hefur þó ekki undir höndum einstök netföng eða lykilorð skráðra notenda.

Langflestir notenda voru með netföng sem enda á @visir.is, næstflest enda á @simnet.is eða 2.116, og þar á eftir kemur @internet.is, alls 656 talsins. Það eru tölvupóstþjónustur sem eru eða hafa verið opnar almennum internetnotendum eða hafa fylgt með nettengingu viðkomandi notanda.

Á meðal annarra áhugaverðra netfangaendinga eru @hi.is en 110 manns með netföng frá Háskóla Íslands hafa skráð sig á síðuna. 42 hafa hins vegar skráð sig með netfangi sem endar á @ru.is sem er lén Háskólans í Reykjavík.

Fimmtán hafa skráð sig með netfangi sem endar á @verslo.is, fjórtán með @nff.is og ellefu með @mr.is en það eru netfangaendingar Verslunarskólans, Nemendafélags Flensborgarskólans og Menntaskólans í Reykjavík.

Sextán hafa skráð sig með netfangi sem endar á @eimskip.is, tólf með netfangi sem endar á @kopavogur.is og jafn margir með netfangi sem endar á @atlanta.is, tveir með netfangi sem endar á @reykjavik.is og netföng fimm notenda enda á @n1.is.

Hér að neðan má sjá heillangan lista þeirra .is-endinga sem hafa tíu notendur eða fleiri.

3605 @visir.is

2116 @simnet.is

656 @internet.is

292 @hive.is

221 @torg.is

217 @mi.is

201 @isl.is

178 @unseen.is

170 @strik.is

127 @talnet.is

110 @hi.is