Trump lofar að sýna öllum sanngirni

Sigur Donalds Trump í forsetakosningunum í Bandaríkjunum hefur skotið ýmsum skelk í bringu, þar á meðal minnihlutahópum á borð við ólöglega innflytjendur og múslimakonur.

„Börnin eru hrædd,“ var til dæmis haft eftir konu af rómönskum uppruna í Los Angeles á fréttavef dagblaðsins LA Times.

Og bandarísk múslimakona skrifaði þetta á Twitter-síðu sína: „Ég óttast að dagurinn í dag verði sá síðasti sem mér hefur fundist ég vera sæmilega örugg með slæðuna.“

Í Kaliforníu, New York og víðar hefur fólk haldið út á götur til að mótmæla hinum nýkjörna forseta.

Sjálfur lagði Trump sig hins vegar fram um það að róa fólk og boðaði sættir í ávarpi sínu í gærmorgun, þegar úrslitin voru komin í ljós: „Ég heiti því að verða forseti allra Bandaríkjamanna, og þetta skiptir mig miklu máli.“

Hann hét því að sýna öllum sanngirni og eiga gott samstarf við allar þjóðir heims. Svo ætlar hann að tvöfalda hagvöxt Bandaríkjanna og fá andstæðinga sína til liðs við sig.

Clinton sagðist í símtali sínu við Trump, stuttu áður en hann flutti ávarp sitt, hafa boðist til þess að starfa með honum að málefnum Bandaríkjanna og hún sagðist vonast til þess að hann muni reynast vel: „Ég veit hve vonsvikin þið eruð því ég er það líka,“ sagði hún. „Þetta er sársaukafullt og mun verða það lengi.“

Hins vegar verði Bandaríkjamenn að viðurkenna úrslitin og una þeim: „Stjórnarskrárbundið lýðræði okkar krefst þess að við tökum þátt, ekki bara á fjögurra ára fresti heldur alltaf.“

Hillary Clinton fékk fleiri atkvæði en Donald Trump í forsetakosningunum á þriðjudag, en tapaði engu að síður. Það stafar af því að hún fær ekki jafn marga kjörmenn.

Hún var komin með um það bil 150 þúsund atkvæðum meira en Trump þegar búið var að telja rúmlega 98 prósent atkvæða, en allt stefndi í að Trump fengi vel yfir 300 kjörmenn af 438, sem dugar honum ríflega til sigurs.

Þetta hefur gerst fjórum sinnum áður í sögu forsetakosninga í Bandaríkjunum, síðast árið 2000 þegar Repúblikaninn George W. Bush sigraði Demókratann Al Gore sem hafði fengið fleiri atkvæði.

Trump hefur með sér meirihluta Repúblikanaflokksins í báðum deildum Bandaríkjaþings, en sú staða hefur verið harla sjaldgæf á síðustu áratugum.

Þar með mætti ætla að Trump muni eiga frekar auðvelt með að koma stefnumálum sínum í gegnum þingið.

Þótt Bandaríkjaforseti geti verið valdamikill með öflugan þingmeirihluta sér við hlið, þá er völdum hans veruleg takmörk sett ef þingið er ekki með honum. Þingið þarf til dæmis að samþykkja öll útgjöld, til dæmis ef reisa á múr við landamæri Mexíkó, og þingið þarf að vera fylgjandi hernaði sem Trump gæti viljað hrinda af stað.

Eitt af því fyrsta sem nýkjörið þing gæti hins vegar komið í framkvæmd, með Trump í fararbroddi, er að kollvarpa heilbrigðisþjónustulöggjöf Baracks Obama sem hefur verið eitt helsta hitamálið í bandarískum stjórnmálum árum saman.

„Þegar Trump tekur formlega við embættinu 20. janúar næstkomandi verður hann 70 ára gamall og kominn 220 daga inn á 71. árið.

Þar með verður hann elstur allra forseta Bandaríkjanna á innsetningardegi. Næstur kemur Ronald Reagan sem var 69 ára og 349 daga þegar hann tók við embætti árið 1981.

Fréttin birtist fyrst í Fréttablaðinu.