Ragnheiður spilar sinn fyrsta landsleik í Höllinni í kvöld

Ívar Ásgrímsson, landsliðsþjálfari kvenna í körfubolta, hefur gert eina breytingu á liðinu fyrir leikinn á móti Portúgal í Laugardalshöllinni í undankeppni EM í kvöld.

Pálína Gunnlaugsdóttir dettur út vegna meiðsla sem hún varð fyrir í leiknum á móti Slóvakíu á laugardaginn. Pálína er einn reynslumesti leikmaður íslenska liðsins og munar því mikið um hana.

Í stað Pálínu tekur Ívar inn Skallagrímskonuna Ragnheiði Benónýsdóttur sem mun því spila sinn fyrsta A-landsleik í kvöld.

Þær Pálína og Ragnheiður spila þó ekki sömu stöðu. Pálína er skotbakvörður en Ragnheiður spilar undir körfunni.

Ragnheiður Benónýsdóttir er uppalin Valskona en hún er á sínu fyrsta tímabili með Skallagrími og er með 9,0 stig og 8,7 fráköst að meðaltali í leik í Domino´s deildinni.

Ragnheiður er þriðji leikmaðurinn sem spilar sinn fyrsta landsleik í þessari landsleikjatörn en Emelía Ósk Gunnarsdóttir og Thelma Dís Ágústsdóttir spiluðu sinn fyrsta landsleik út í Slóvakíu á laugardaginn.

Portúgal er með einn sigur og fjögur töp eins íslenska liðið en vann tólf stiga sigur í fyrri leik þjóðanna út í Portúgal, 68-56.

Íslenska landsliðið í kvöld:

Nr. 5 Ragnheiður Benónýsdóttir

Nr. 6 Salbjörg Sævarsdóttir

Nr. 7. Emelía Ósk Gunnarsdóttir

Nr. 8. Ingunn Embla Kristínardóttir

Nr. 9. Sigrún Ámundadóttir

Nr. 10. Gunnhildur Gunnarsdóttir

Nr. 12. Sandra Lind Þrastardóttir

Nr. 13. Ingibjörg Jakobsdóttir

Nr. 14. Hallveig Jónsdóttir

Nr. 15. Thelma Dís Ágústsdóttir

Nr. 22. Berglind Gunnarsdóttir

Nr. 25. Ragna Margrét Brynjarsdóttir

 

Þjálfari: Ívar Ásgrímsson

Aðstoðarþjálfari: Bjarni Magnússon