Páll Rafnar aðstoðar Þorgerði Katrínu

Páll Rafnar Þorsteinsson hefur verið ráðinn aðstoðarmaður Þorgerðar Katrínar Gunnarsdóttur sjávarútvegs- og landbúnaðarráðherra.

Í tilkynningu frá atvinnuvegaráðuneytinu segir að Páll Rafnar muni láta af störfum sem forseti Félagsvísindadeildar Háskólans á Bifröst þar sem hann hefur starfað undanfarin ár við kennslu og stjórnun.

Hann var í þriðja sæti Viðreisnar í Reykjavíkurkjördæmi norður fyrir þingkosningarnar sem haldnar voru í október.

Þar áður starfaði Páll sem ráðgjafi hjá almannatengslafyrirtækinu KOM. Þá hefur hann unnið að rannsóknum og við ritstörf á sviði alþjóðastjórnmála og stjórnmálaheimspeki fyrir hugveitur í Bretlandi.

„Páll Rafnar er með doktorspróf í heimspeki frá Cambridge háskóla og fjallaði lokaritgerð hans um lagahugtakið (nomos) í stjórnspeki Aristótelesar. Ransóknarsvið Páls Rafnars hefur aðallega snúið að hugmyndum - bæði klassískum og nútímalegum - um sanngirni, siðvit  og réttlæti.

Páll Rafnar er auk þess með meistaragráðu í stjórnmálaheimspeki frá London School of Economics og BA gráðu í heimspeki og grísku frá Háskóla Íslands,“ segir í fréttinni.