Litli Hjalli í loftinu á ný

Ég ákvað að opna netmiðilinn aftur, það var meiri eftirspurn eftir honum en ég hafði áttað mig á. Mér fannst líka ómögulegt að vera ekki í loftinu,“ segir Jón Guðbjörn Guðjónsson í Litlu-Ávík í Árneshreppi á Ströndum um fréttaveituna Litla Hjalla.



Hann segir marga vilja fylgjast með lífinu í Árneshreppi þó þar sé fámennt og ekki stórtíðinda að vænta á hverjum degi. „Það eru fjölmiðlar, brottfluttir, annað fólk á landsbyggðinni, bændasamtökin og stjórnmálamenn,“ nefnir hann sem dæmi.

Jón hélt úti vefnum Litla Hjalla frá 2003 til ársloka 2015, fyrst sem bloggsíðu og síðar fréttasíðu Árneshrepps.



„Þegar ég lagði niður Litla Hjalla fyrir ári var ég svo vitlaust að sleppa léninu litlihjalli.is lausu og þegar ég ætlaði að taka það upp aftur var eitthvert spilavíti í Englandi búið að hrifsa það til sín. Svo ég er núna með með litlihjalli.it.is.

Þó fátt sé að frétta suma daga getur Jón alltaf upplýst fólk um veðrið enda veðurathugunarmaður. Hann er uppalinn í Litlu-Ávík en bjó árum saman í borginni og starfaði fyrir Veðurstofuna og Flugmálastjórn. Nú er hann fluttur norður aftur. Fyrir utan veðurathugun og fréttamennsku nær hann í póstinn út á flugvöll á Gjögri og dreifir honum innan sveitar auk þess að sinna eldamennsku fyrir sig og bróður sinn, Sigurbjörn Sveinbjörnsson.

Jón kveðst fara út að lesa af mælum fimm sinnum á sólarhring, fyrst klukkan sex á morgnana. „Það þykir nauðsynlegt að senda veður snemma til að geta gefið upplýsingar um sjólagið,“ segir hann.

Ekkert er róið frá Norðurfirði á þessum árstíma að sögn Jóns. „Það er ekki hægt að treysta á að koma fiski burtu,“ segir hann en bætir við að oftar hafi þó verið fært í sveitina landleiðina nú en flesta aðra vetur.

 

Greinin birtist fyrst í Fréttablaðinu 28. janúar 2017.