Enginn Justin í kvöld

Justin Shouse, leikstjórnandi Stjörnunnar, verður ekki með liðinu á móti Þór Þorlákshöfn i 17. umferð Domino´s deildar karla í körfubolta í kvöld.

Þetta staðfestir þjálfari liðsins, Hrafn Kristjánsson, í samtali við karfan.is.

Justin Shouse er algjör lykilmaður í Stjörnuliðinu með 17,1 stig og 4,9 stoðsendingar að meðaltali í leik. Það mun því muna mikið um hann ekki síst undir lok leikjanna þegar hann er oftast í aðalhlutverki.

Leikur Stjörnunnar og Þórs verður sýndur beint á Stöð 2 Sport 3 í kvöld og hefst útsendingin klukkan 19.05.

Þetta verður annar leikur Stjörnunnar í röð án Justin en hefur aðeins spilað einn hálfleik af síðustu sex hjá liðinu.

Justin Shouse meiddist upphaflega á höfði á æfingu fyrir leik á móti Njarðvík um miðjan janúar. Hann missti af Njarðvíkurleiknum en snéri síðan aftur í leik á móti Keflavík.

Justin varð að hætta leik í hálfeik í Keflavík og hefur síðan ekkert spilað síðan þá en leikurinn í Keflavík fór fram 27. janúar.

Shouse, hefur verið að leita ráða hjá læknum og notaði bikarhléið til að hvíla sig fyrir lokasprett deildarkeppninnar. Nú er ljóst að hann þarf lengri hvíld.

Stjarnan vann Keflavík í framlengingu án Justin og vann svo öruggan sigur á botnliði Snæfells í síðasta leik. Það mun reyna á leikmannahópinn að vera án hans á móti sterku liði Þórs úr Þorlákshöfn í kvöld.