Stólarnir mega helst ekki sjá þessa tölfræði fyrir kvöldið

Tindastóll og Keflavík hefja í kvöld einvígi sitt í átta liða úrslitum Domino´s deildar karla í körfubolta en liðið sem fyrr vinnur þrjá leiki tryggir sér sæti í undanúrslitum úrslitakeppninnar.

Tindastóll endaði í þriðja sæti Domino´s deildar karla en Keflavík í því sjötta. Bæði liðin töpuðu í lokaumferð deildarkeppninnar en Stólarnir náðu ekki að fagna sigri í síðustu tveimur deildarleikjum sínum.

Tindastóll tapaði fyrir Grindavík á heimavelli og Haukum á útivelli í síðustu tveimur leikjum sínum. Bæði voru töpin þó eins naum og þau verða, Tindastólsliðið tapaði á flautukörfu á heimavelli á móti Grindavík og með þremur stigum á útivelli á móti Haukum.

Tapleikirnir tveir setja Stólanna hinsvegar í flokk með liðum sem hefur ekki gengið alltof vel í úrslitakeppninni í gegnum tíðina. Stólarnir mega nefnilega helst ekki sjá eftirfarandi tölfræði fyrir leik kvöldsins en átján ár síðan að lið í sömu stöðu komst áfram í undanúrslitin.

Aðeins þrjú lið með heimavallarrétt í fyrstu umferð úrslitakeppninnar hafa komið inn í úrslitakeppnina með tveggja leikja taphrinu á bakinu á þessari öld og öll þrjú duttu þau út úr átta liða úrslitunum.

Skallagrímsliðið frá 2007, KR-liðið frá 2003 og Tindastólsliðið frá 2000 voru öll með heimavallarrétt í átta liða úrslitunum þrátt fyrir að tapa tveimur síðustu leikjum sínum fyrir úrslitakeppni.

Tvö þeirra, KR 2003 og Tindastóll 2000, töpuðu báðum leikjum sínum í átta liða úrslitunum og þar með fjórum síðustu leikjum tímabilsins en Skallagrímsliðið náði að vinna einn leik í átta liða úrslitunum.  Borgnesingar voru hinsvegar sendir í sumarfrí í oddaleiknum í Fjósinu.

Eina liðið sem hefur komist í undanúrslitin í slíkri stöðu, síðan að úrslitakeppnin varð að átta liða keppni vorið 1995, er lið Grindavíkur frá árinu 1999. Grindavík vann þá 2-0 sigur á KR í átta liða úrslitunum en það fylgir líka sögunni að KR-ingar töpuðu líka síðustu tveimur leikjum sínum fyrir úrslitakeppni.  Grindavík tapaði síðan 3-1 á móti verðandi Íslandsmeisturum Keflavíkur í undanúrslitunum.



Lið með heimavallarrétt í átta liða úrslitum sem töpuðu tveimur síðustu deildarleikjum sínum fyrir úrslitakeppni:

Skallarímur 2007 - datt út í átta liða úrslitum (1-2 á móti Grindavík)

KR 2003 - datt út í átta liða úrslitum (0-2 á móti Njarðvík)

Tindastóll 2000 - datt út í átta liða úrslitum (0-2 á móti KR)

Grindavík 1999 - - datt út í undanúrslitum (1-3 á móti Keflavík)