Segja Manchester United tilbúið að borga ofurlaun og metfé fyrir Neymar

Spænska blaðið Sport slær því upp í morgun að Brasilíumaðurinn Neymar sé að öllum líkindum að fara klæðast búningi Manchester United í ensku úrvalsdeildinni á næsta tímabili.

Samkvæmt frétt Sport hafa fulltrúar Manchester United og umboðsmaður Neymar rætt saman og þar kom fram að United er tilbúið að borga kappanum 416 þúsund pund í vikulaun.

Þetta gera 57,5 milljónir og það sem meira er að þetta er eftir skatt. 57,5 milljónir eru 8,2 milljónir á dag sjö daga vikunnar.

Það fylgir líka sögunni að Manchester United er síðan tilbúið að borga þær 173 milljónir punda sem kostar að kaupa upp samning Neymar við Barcelona. Það myndi að sjálfsögðu gera hann að dýrasta knattspyrnumanni sögunnar og rúmlega það.

Það er ljóst á þessu að Neymar mun hagnast mikið fjárhagslega á því að fara til Manchester United og þar þarf hann heldur ekki að vera lengur í skugganum á Lionel Messi. Við það bætist að Manchester United er þekktasta og ríkasta fótboltafélag heims sem ætti að gefa honum meiri möguleika á því að stækka nafn sitt og vörumerki á alþjóðavísu.

Ensku blöðin taka líka upp þessa frétt og stuðningsmenn United spennast örugglega allir upp við það að sjá möguleikanna á því að einn besti sóknarmaður heims sé á leiðinni á Old Trafford.

Neymar da Silva Santos Júnior er 25 ára gamall síðan í febrúar og hefur spilað hjá Barcelona frá árinu 2013. Hann lék áður með Santos í Brasilíu.

Neymar hefur skorað mun minna á þessu tímabili (14 mörk í 35 leikjum) en tvö tímabil á undan (31 mark og 39 mörk) en hefur verið þeim mun meira í því að leggja upp mörk fyrir félaga sína.

Neymar hefur skorað 51 mark í 76 landsleikjum fyrir Brasilíu og er þegar kominn upp í fjórða sætið yfir markahæstu landsliðsmenn Brassa frá upphafi.