Icebody og Ari Jóseps leiða saman hesta sína og dæla út sketsum í leikhópnum X

„Leikhópurinn X varð til seinnihluta árs 2014. Við vorum öll saman á leiklistarnámskeiði og þegar það kláraðist langaði okkur að halda áfram að skapa eitthvað skemmtilegt,“ segir Birgitta Sigursteinsdottir, einn af forsprökkum leikhópsins X sem hefur heldur betur sett svip sinn á myndbandveituna YouTube en hátt í þrjátíu sketsar eru komnir frá hópnum.

„Leiklist er líka svolítið eins og líkamsrækt, maður verður að halda sér í æfingu. Allir í hópnum höfðu líka mikið unnið sem aukaleikarar í ýmsum þáttum og kvikmyndum en þar er oft erfitt að fá stærri hlutverk með setningum. Þess vegna langaði okkur að búa til tækifæri sjálf til að koma okkur á framfæri og fá skemmtileg alvöru hlutverk.“

Hún segir að hópurinn sé búin að vinna töluvert að handriti að sjónvarpsseríu sem ber nafnið Hótel Hamingja og myndi flokkast undir karaktermiðað gamandrama. Hulda Lind Kristins er partur af hópnum en margir þekkja hana sem Icebody. Einnig kemur Ari Jósepsson, fyrrum forsetaframbjóðandi, inn sem aukaleikari en þau hafa mikið unnið saman í gegnum tíðina.

Gaman að þróa karakterana

„Það er stórt verkefni svo það ferli tekur langan tíma en það hefur verið mjög gaman að fá að þróa karakterana, búa til aðstæður fyrir þá og svo fær hver leikari að spinna út frá því. Það verk er í vinnslu ennþá.“

Birgitta segir að sjónvarpsseríuferlið sé langt og því hafi verið tekin ákvörðun að gera eitthvað sem væri hægt að vinna fljótt og birta á netinu.

„Eitthvað sem gæti glatt fólk í skammdeginu. Í september 2016 fórum við þess vegna að gera stutta sketsa og setja á YouTube. Við hittumst alltaf einu sinni í viku og tökum upp og birtum svo einn skets á viku. Stundum er þetta bara eitthvað fyndið grín sem okkur dettur í hug, já eða höfum lent í og stundum er þetta eitthvað meira current sem tengist fréttum vikunnar. Við reynum að hafa fjölbreytni í þessu því allir eru með mismunandi húmor. Fólk hefur tekið mjög vel í þetta og það er alltaf gaman að heyra að fólk eigi sér mismunandi uppáhalds sketsa. Þeir eru núna orðnir 27 talsins svo þetta er talsvert mikið efni sem við erum búin að gera síðustu mánuði.“

Síðasta haust gerði hópurinn mínútumyndina Same sem er í raun ádeila á viðhorf heimsins til flóttamanna.

„Sú mynd var nýlega valin af The One Minutes Foundation og verður sýnd sem hluti af seríunni Make Being Radical Again á 10 listasöfnum í Þýskalandi, Hollandi og Kína í apríl. Það er auðvitað mikill heiður fyrir okkur að hafa verið valin í þetta og vonandi fær myndin fólk til að hugsa um þessi málefni.“

Facebook: https://www.facebook.com/leikhopurinnx

YouTube https://www.youtube.com/leikhopurinnx

Í Leikhópnum X árið 2017 eru:

Birgitta Sigursteinsdóttir

Birna Halldórsdóttir

Ester Sveinbjarnardóttir

Halldóra Eyfjörð

Hjörtur Sævar Steinason

Hulda Lind Kristins

Jens Jensson

Magnea Baldursdóttir