Allt gengur út á að bæta sig

Ég er að bregða mér til London með manninum mínum. Við ætlum að spila golf og vera svo nokkra daga í borginni að njóta menningarinnar,“ segir Sigurrós Þorgrímsdóttir, innt eftir því hvernig hún ætli að halda upp á sjötugsafmælið sem er á morgun, páskadag.

 „Svo ætla ég með öllum börnum og barnabörnum til Spánar síðar í vor í hálfsmánaðarferð. Ég á fjögur börn og níu barnabörn þannig að það er góður hópur.“

Þótt Sigurrós sé komin á eftirlaunaaldur er hún enn að vinna í hlutastarfi hjá Sunnuhlíðarsamtökunum, nánar tiltekið með íbúðarréttarsamningana.

„Maður má ekki drepast úr leiðindum,“ segir hún glaðlega. „Ég hef alltaf haft gaman af að vinna og finnst það dýrmætt, er líka svo lánssöm að vera heilsuhraust.“

Sigurrós er Kópavogsbúi og sat í bæjarstjórn þar í 16 ár. „Mér fannst mjög skemmtilegt að vera í bæjarstjórn,“ segir hún og rökstyður það: „Ef maður tekur ákvörðun um að framkvæma eitthvað þá sér maður það gerast. Aftur á móti var ég um tíma á þingi og þar fannst mér ég aldrei sjá árangurinn af því sem ég var að gera. Ferlið er svo langt. “

Sigurrós flutti í Kópavoginn 1978 og ætlaði bara að vera eitt ár en er þar ennþá. „Við hjónin skutum bara rótum djúpt og fast, meira að segja vilja börnin okkar helst vera hér líka.“

Á tímabili var Sigurrós formaður aðalstjórnar Breiðabliks og lætur vel af því. Skyldi hún vera íþróttamanneskja? 

„Ég hef að minnsta kosti mjög gaman af að fylgjast með öllum íþróttum og svo er ég á kafi í golfi og hef verið í ein fimmtán ár.

Nú vona ég að ég fari að lækka forgjöfina, það er draumurinn.  Allt gengur út á að reyna að bæta sig, hvort sem er í golfi eða lífinu sjálfu.“