Chaka Khan og SSSól á sérstakri opnunarhátíð Secret Solstice

Drottning fönksins, Chaka Khan mun opna Secret Solstice-tónlistarhátíðina á veglegri opnunarhátíð sem haldin verður fimmtudaginn 15. júní, daginn áður en hátíðin hefst formlega.

Verður þetta í fyrsta skipti sem sérstök opnunarhátíð er haldin fyrir hátíðina síðan hún var gangsett árið 2014. Á opnunarkvöldinu munu ásamt henni koma fram hin goðsagnakennda hljómsveit SSSól og stuðboltarnir í Fox Train Safari. 

„Ég elska Chaka Khan og hef dreymt um að spila með henni alla ævi, það er ótrúlegur heiður að vera að hita upp fyrir hana á opnunarhátíð Secret Solstice,” segir sjálfur forsprakki sveitarinnar SSSÓL, Helgi Björnsson. Bætist þetta kvöld því við dagskrá Secret Solstice sem inniheldur atriði á borð við Foo Fighters, The Prodigy, Rick Ross, Big Sean og fleiri.

Einnig mun ameríski indíáninn og listamaðurinn JoaqoPelli blessa hátíðarsvæðið fyrir viðburðinn þannig að hátíðargestir geta skemmt sér á vernduðu svæðinu undir miðnætursólinni.

Mikla athygli vakti það þegar Shaman Duran, andlegur leiðtogi frá Bandaríkjunum opnaði hátíðina árið 2015 en hann lagði blessun sína á hátíðarhöldin og uppskar mikinn fögnuð hátíðargesta.

Sú hefð hefur tekið sér bólfestu hjá skipuleggjendum Secrte Solstice að tilkynna leynigest ár hvert og verður að sjálfsögðu engin undantekning á því í ár. Í fyrra var það Sister Sledge og árið fyrir það var það Busta Rhymes en atriðið verður ekki tilkynnt fyrr en daginn sem opnunarhátíðin fer fram. Leynigestur hátíðarinnar í ár mun koma fram á þessari opnunarhátíð.

Eins og áður hefur komið fram mun opnunarhátíðin fara fram 15. júní og bætist það kvöld því við tónlistarhátíðina sjálfa, hátíðargestum að kostnaðarlausu. Mjög takmarkað upplag verður af miðum sem gilda einungis á opnunarhátíðina.

Munu þeir miðar kosta 5.900 krónur á meðan þeir fást en aðeins verða tvö þúsund slíkir miðar verða í boði. Þá verður hægt að kaupa eftir klukkan 11:00 á morgun, 13. apríl í gegnum miðasöluvef tix.is. Miðar á tónlistarhátíðina sjálfa fást á heimasíðunni  tix.is og secretsolstice.is.

Vertu þú sjálfur með SSSól