Boða stofnun félags ungs áhugafólks um sjávarútveg

UFSI, félag ungs áhugafólks um sjávarútveg og sjávarútvegsmál á Íslandi og úti í heimi, verður stofnað næstkomandi þriðjudag.

Félagið mun hafa að leiðarljósi að skapa málefnanlega og óhlutdræga umræðu um greinina, en á Facebook síðu félagsins kemur fram, að aðstandendum félagsins þykji umræðan um sjávarútvegsmál oft vera á villigötum.

Í samtali við Vísi segir Tryggvi Másson, einn þeirra aðila sem kemur að stofnun félagsins, að hugmyndin hafi vaknað síðastliðið vor og þá hafi verið stofnaður Facebook hópur. Margir hafi þá skráð sig og haft samband við þá félaga og lýst yfir áhuga á þátttöku í slíku félagi.

Tryggvi segir að félaginu sé fyrst og fremst ætlað að vekja athygli á sjávarútvegi og tengdum greinum en ekki að vera einhverskonar hagsmunasamtök í sjávarútvegi.

„Við viljum fyrst og fremst vekja athygli ungs fólks á öllu því starfi sem á sér stað og umfangi atvinnugreinarinnar, sem og að vera umræðuvettvangur fyrir þau mál sem koma upp tengd atvinnugreininni.“

„Við ætlum ekki að taka afstöðu til ákveðinna mála, heldur vera vettvangur þar sem fólk getur skipst á skoðunum og fræðst um sjávarútvegsmál, allt frá einföldustu til flóknustu mála.“

Þorgerður Katrin Gunnarsdóttir, sjávarútvegsráðherra, mun meðal annars mæta og halda tölu, en fundurinn fer fram klukkan 17:00 í húsakynnum sjávarútvegsráðuneytisins á Skúlagötu 4.