Norður-Kóreskir ráðamenn vara Ástrali við hugsanlegri kjarnorkuvopnaárás, ef áströlsk stjórnvöld munu halda áfram, því sem Norður-Kóreumenn kalla „blindan stuðning“ þeirra við Bandaríkin. Guardian greinir frá.
Hörð viðbrögð Norður-Kóreumanna koma í kjölfar ummæla utanríkisráðherra Ástralíu, Julie Bishop, á fundi hennar með Mike Pence, varaforseta Bandaríkjanna, sem nú er staddur í opinberri heimsókn í Ástralíu.
Bishop lét hafa eftir sér að Norður-Kóreumenn yrðu beittir frekari refsiaðgerðum af hálfu Ástrala, haldi þeir áfram eldflaugatilraunum sínum.
Norður-Kóreskir talsmenn brugðust ókvæða við.
„Ástralski utanríkisráðherrann ætti að hugsa sig tvisvar um og hugleiða afleiðingarnar áður en hún missir stjórn á máli sínu einungis til þess að þóknast bandarískum yfirboðurum sínum.“
Ráðherrann hefur áður tjáð sig um málefni Norður-Kóreu og bent á að eldflaugatilraunir þeirra sé gífurleg ógn við Ástralíu. Hún hefur ítrekað kallað eftir viðbrögðum alþjóðasamfélagsins vegna þeirra.
Norður-Kórea hótar Ástralíu vegna ummæla utanríkisráðherrans
