Stjarnan bætir við sig Kana sem gæti spilað sem Íslendingur

Stjarnan er búin að ganga frá samningi við bandaríska leikmanninn Collin Pryor og mun hann spila með Garðabæjarliðinu í Domino´s-deildinni á næstu leiktíð.

Það er umboðsskrifstofa leikmannsins sem greinir frá þessu á Facebook-síðu sinni en sagt er að hann hafi skrifað undir langtíma samning við Stjörnuna.

Pryor kemur til Stjörnunnar frá 1. deildar liði Fjölnis en þar var hann stiga- og frákastahæstur með 21 stig og tólf fráköst að meðaltali í leik. Fjölnir hafnaði í öðru sæti 1. deildarinnar og fór í sumarfrí eftir tap á móti Hamri í undanúrslitum umspilsins um sæti í efstu deild.

Þó Pryor sé bandarískur gæti farið svo að hann spili sem Íslendingur á næstu leiktíð þar sem hann er búinn að spila í þrjú ár hér á landi. Það er þó alls ekki öruggt.

Samkvæmt reglubreytingu á síðasta ársþingi KKÍ verður auðveldara fyrir Bandaríkjamenn sem hafa verið hér það lengi að teljast sem íslenskir leikmenn í deildinni.

Hrafn Kristjánsson, þjálfari Stjörnunnar, segir í samtali við Vísi að Garðbæingar geri frekar ráð fyrir að Pryor spili sem erlendur leikmaður næsta tímabil þar sem hann hafi ekki skráða, samfellda þriggja ára búsetu á landinu. Hann muni þó á endanum telja sem íslenskur leikmaður enda ákveðinn í því að dvelja á landinu til framtíðar og verða íslenskur ríkisborgari