Rörasprengjan hefði getað kostað mannslíf

Lögreglan á höfuðborgarsvæðinu ítrekar að almenningur hafi í huga þá miklu hættu sem stafast getur af rörasprengjum. Ein slík fannst í strætóskýli í Kópavogi í gær en í tilkynningu frá lögreglu kemur fram að sprengjan hefði getað kostað mannslíf.

Um sjöleytið í gærkvöldi kallaði ungur maður eftir aðstoð lögreglu vegna þess að hann fann sprengju í strætóskýli við Hlíðarveg í Kópavogi. Sprengjan reyndist rörasprengja.

Í tilkynningu frá lögreglunni á höfuðborgarsvæðinu sem send var út nú rétt fyrir 17 segir að lögreglan ítreki varnarorð sín vegna þeirra hættu sem stafar af rörasprengjum.

„Lögreglan á höfuðborgarsvæðinu vill ítreka varnaðarorð sín frá í gærkvöld um þá miklu hættu sem stafar af rörasprengjum, en tilefnið var að ein slík fannst í strætóskýli á Hlíðarvegi í Kópavogi. Rörasprengjur hafa komið við sögu hjá lögreglu annað slagið í gegnum árin og sjálfsagt verður aldrei nógu oft sagt hversu hættulegar þær eru. Rörasprengjan, sem fannst í gær, hefði getað kostað mannslíf. Þess vegna á fólk alltaf að hafa strax samband við lögreglu ef það finnur rörasprengju og alls ekki að hreyfa við henni.“

Sprengjan sem fannst í strætóskýlinu í gær var flutt á brott af sprengjusveit lögreglu. Lögregla segir augljóst að ef einhver hefði staðið við hlið hennar þegar hún sprakk hefðu afleiðingarnar orðið alvarlegar.

„Rörasprengjan sem fannst í Kópavogi var flutt á öruggt svæði þar sem henni var eytt. Líkt og sjá má á annarri myndinni, sem Lögreglan á höfuðborgarsvæðinu hefur birt, er augljóst að ef einhver hefði staðið við hlið sprengjunnar er hún sprakk, væri hinn sami jafnvel ekki til frásagnar um það. Á myndinni má enn fremur sjá hvernig málmagnir þeytast í allar áttir og þeir sem standa jafnvel  einhverja tugi metra í burtu væru í mjög mikilli hættu,“ segir í tilkynningu frá lögreglu.