Lækna-Tómas tjaldaði á toppi Miðþúfu á Snæfellsjökli

Tómasar Guðbjartsson, sem á stundum hefur verið kallaður Lækna-Tómas, hefur birt ævintýralegar myndir af tjaldi sínu, en hann kallar ekki allt ömmu sína hvar hann slær því upp.

Ferðir Tómasar um landið að undanförnu hafa vakið verðskuldaða athygli og til að mynda tókst honum að koma landsbyggðarmönnum mörgum á Vestfjörðum úr jafnvægi þegar hann fordæmdi fyrirhugaðar virkjunarframkvæmdir þar.

En, í allt sumar hefur Tómas birt myndir af tjaldi sínu meðal annars meðfylgjandi myndum sem Vísir fékk góðfúslegt leyfi hans, sem og ljósmyndaranna Sigtryggs Ara Jóhannssonar og Ólafs Más Björnssonar, til að birta þær hér.

Í vikunni fór hann á Snæfellsjökul og lét sig ekki muna um að slá tjaldi sínu upp þar.

Minnsta tjaldstæði á Íslandi? spyr Tómas og greinir frá því að hann hafi, ásamt Ólafi og Sigtryggi Ara og 12 öðrum vinum, farið í fjallaskíðaferð á Snæfellsjökul.

„Toppuðum Miðþúfu (1447 m) rétt fyrir miðnætti en aðstæður voru frábærar og gat ég skíðað alveg frá toppnum og niður. Ákvað að slá upp tjaldinu mínu á toppi Miðþúfu, sem tókst þrátt fyrir töluvert rok. Myndin sýnir að tjaldstæðið er ekki mikið um sig en verðugur keppandi um titilinn flottasta tjaldstæði á Íslandi,“ segir Tómas en vísar þar til einskonar keppni sem hann hefur efnt til á Facebooksíðu sinni.

„Sennilega er þó erfitt að sofa rótt þarna uppi þar sem snarbrattar hlíðar umlykja tindinn,“ bætir Tómas við og bendir á að Óli Már hafi náð „skemmtilegum drónamyndum af þessu tiltæki og Sigtryggur Ari líka.“