Getspakur Reykvíkingur í sjöunda himni: Breytti 20 evrum í 2 milljónir á ævintýralegan hátt

Maður nokkur var með 13 leiki rétta á seðli hjá Betsson. Líkur á slíku eru fáránlega litlar en hann hitti á það. Og breytti við þetta 20 evrum, sem hann hafði fengið í bónusgjöf frá Betsson, í tvær milljónir í íslenskum krónum. Maðurinn, sem ekki vill láta nafns síns getið af ýmsum ástæðum, var býsna hress þegar Vísir ræddi við hann nú í morgun. Enda eru líkurnar á því að úrslit verði með þessum hætti einn á móti 897 og sjaldgæft að menn setji 2,400 krónur á jafn ólíklegan stuðul.

Eistar björguðu seðlinum í hús

„Þetta var skemmtilegt,“ segir hann fjallhress en hann veðjaði á leiki í Evrópukeppninni 6. þessa mánaðar. Hann sagði að það hafi tekið verulega á þegar síðasti leikurinn á seðlinum datt í hús. Leikirnir á seðlinum hófust þá um daginn en þessi fór fram um kvöldið. B36 frá Þórshöfn gegn Nomme Kalju frá Eistlandi.

„Stórkostlegur leikur að fylgjast með. Ég hélt reyndar fyrst að þetta væru Finnar og ef ég hefði áttað mig á því að þetta voru Eistar, sem aldrei hafa þótt neinir snillingar í fótbolta, hefði ég aldrei veðjað svona. Þetta er svo finnskt nafn: Nomme Kalju. En, það var 1 – 1, lítið eftir og ég var farinn að óttast að Eistarnir væru búnir að pakka í vörn. Til að halda fengnum hlut. En þeir potuðu inn einu og þá datt þetta í hús.“

Eins og sjá má á veðmálaseðlinum sem Vísir birtir hér ofar var stuðullinn 2,27 á þann leik, þannig að hann gaf ágætlega. Færeyingar eru á uppleið í fótboltanum eins og FH í Hafnarfirði komust að raun um í sínum Evrópuleik. Maðurinn segir að sem betur fer hafi FH ekki verið á seðlinum. „Þeir voru ekki að spila þarna. Ég var með nokkra vafninga í gangi í gær og FH-ingar skemmdu nokkra þeirra. Ég ætla að gefa þeim séns á að borga til baka og veðja á þá þegar þeir fara til Færeyja. Nú lít ég svo á að þeir skuldi. Annars mæti ég í Kaplakrika í allt sumar og öskra ókvæðisorðum á þá.“

Kampavín og koníak á eftir

Eins og lesendur Vísis eru ef til vill farnir að átta sig á þá er maðurinn kátur. Hann segir að flesta muni um tvær milljónir. En, þetta er ekki fugl í hendi því af því að það sem hann lagði undir var bónusvinningur þá þurfi hann að velta þessum tveimur milljónum í gegnum kerfið. Maðurinn telur eðlilegt að Betsson hafi slíka skilmála á vinninga sem koma í gegnum bónusveðmál, sem þetta var.

„Ég hef 60 daga til þess. Nú er ég bara í vinnunni að „gambla“ og hef mjög gaman að því.“

Hann segir að hann geti lagt allt á einn leik og fengið þá útgreitt, eða ekki, en hann þorir ekki að taka slíkan séns. En, um leið og ég er búinn að velta þessu í gegn og fá útborgað, þá verður kampavín og koníak á eftir. Virkilega sætt að sjá eitthvað svona detta inn.“

Tekur ekki smálán fyrir veðmálum sínum

Maðurinn ónafngreindi segist enginn sérfræðingur en hann hefur hins vegar fylgst vel með fótboltanum árum saman og sérstaklega Evrópukeppninni og leikjum þar. Og hann segir að það auki verulega á ánægjuna að fylgjast með leikjum ef veðjað er á þá, og það hefur hann gert lengi.

„Það verður að segjast alveg eins og er. Leikirnir verða miklu skemmtilegri fyrir vikið. Þetta dregur mann áfram í fræðsluleit um lið og landafræði. Ég er með sæmilegan reikning hjá Betsson. Stundum hefur hann verið fínn. Stundum ekki. Maður er ekkert að taka smálán fyrir þessu. Ef það er eitthvað til á debetinu, þá hendir maður á þetta,“ segir hinn fjallhressi og káti viðmælandi Vísis.