Skátatjöldin fuku vítt og breitt um Suðurland

Nóttin reyndist mörgum erlendum skátum erfið vegna storms sem gekk yfir Suðurland.

„Í Hveragerði leitaði hópur skáta inn í gróðurhús en á Selfossi fuku og eyðilögðust tugir tjalda hjá skátunum. Tjón á stórum tjöldum og búnaði hefur ekki enn verið metið,“ segir Sölvi Melax kynningarfulltrúi hins mikla skátamóts sem nú er yfirstandandi á Íslandi, með þátttöku fimm þúsund skáta sem hafa dreift sér um landið - World Scout Moot 2017.

Í sérstakri tilkynningu frá Sölva er vitnað í Hermann Sigurðsson, framkvæmdastjóra Bandalags íslenskra skáta sem segir:

„Veðrið í gærkvöldi og nótt kom mörgum erlendum skátum á óvart, enda veðurhæðin meiri en þeir eiga að venjast í heimalöndum sínum. Í gærkvöldi voru tjaldbúðirnar á Selfossi teknar niður og allir fluttir í skóla í nágrenninu. Unnið er að því að flytja búðirnar á Úlfljótsvatn eftir dagskrá í kvöld enda koma allir 5.000 skátarnir Úlfljótsvatn á morgun.“

En, áður en kemur til þess munu skátarnir hins vegar mála höfuðborgina appelsínugula því þeir ætla að efna til hópdans á Skólavörðustíg nú klukkan fimm, eins og Vísir hefur þegar greint frá.

Framkvæmdaraðilar mótsins hafa unnið hörðum höndum í morgun við að aðstoða skátana við að fá nauðsynlegan viðlegubúnað, ýmist lánaðan eða keyptan. Vonir standa til að í kvöld verði búið að leysa þetta vandamál.

Alls eru um 5.000 skátar í sjálfboðastörfum víða um land. Skátar hafa meðal annars unnið við stígagerð við Seljalandsfoss, í Reykjadal og á mörgum fleiri stöðum sem hafa verið í umræðunni vegna mikils álags ferðamanna.