Sigtryggur Arnar fær að stíga fyrstu landsliðsskrefin á gamla heimavellinum

Sigtryggur Arnar Björnsson er í leikmannahópi Íslands í kvöld en karlalandsliðið spilar þá við Belgíu í Smáranum en þetta er fyrsti undirbúningsleikur liðsins fyrir Eurobasket.

Sigtryggur Arnar er eini nýliðinn í íslenska liðinu og spilar því fyrsta A-landsleikinn sinn í kvöld.  Logi Gunnarsson er hinsvegar sá reyndasti en hann spilar sinn 131. A-landsleik í Smáranum í kvöld. Leikurinn hefst klukkan 19.15.

Sigtryggur Arnar lék á sínum tíma með Breiðabliki og er því að stíga fyrstu landsliðsskrefin á gamla heimavellinum.  

Sigtryggur Arnar fór á kostum með Skallagrími í Domino´s deildinni á síðustu leiktíð og var þá með 18,0 stig, 5,8 fráköst og 5,3 stoðsendingar að meðaltali í leik.

Skallagrímur féll hinsvegar úr deildinni og Arnar hefur nú samið við Tindastól um að leika á Króknum í vetur.

Jón Arnór Stefánsson og Pavel Ermolinskij eru hvorugur með í þessum leik ekki frekar en miðherjinn Tryggvi Snær Hlinason sem er að safna kröftum eftir EM 20 ára liða líkt og þeir Kári Jónsson og Kristinn Pálsson.  Íslendingar hafa efni á því að hafa tvo sjö feta leikmenn utan hóps í leiknum í kvöld því Ragnar Ágúst Nathanaelsson hvílir líka.



Leikmannahópur Íslands á móti Belgíu í kvöld:

Bakverðir

3 - Ægir Þór Steinarsson

10 - Elvar Már Friðriksson

12 - Sigtryggur Arnar Björnsson

13 - Hörður Axel Vilhjálmsson

14 - Logi Gunnarsson

15 - Martin Hermannsson

Framherjar

6 - Kristófer Acox

21 - Ólafur Ólafsson

24 - Haukur Helgi Pálsson

88 - Brynjar Þór Björnsson

Miðherjar:

7 - Sigurður Gunnar Þorsteinsson

8 - Hlynur Bæringsson