Auður ráðin nýr framkvæmdastjóri Sólheima

Sólheimar ses. hafa ráðið Auði Finnbogadóttur tímabundið sem framkvæmdastjóra Sólheima. Hún mun hefja störf þann 26. júlí næstkonandi. Staða framkvæmdastjóra Sólheima verður svo formlega auglýst á vormánuðum á næsta ári.

Í tilkynningu frá Sigurjóni Erni Þórissyni, stjórnarformanni Sólheima, kemur fram að Auður sé viðskiptafræðingur frá University of Colorado og hafi útskrifast með með MBA frá Háskólanum í Reykjavík.

„Hún hefur starfað lengi sem framkvæmdastjóri á fjármálamarkaði og situr í stjórn Íslandsbanka. Auður mun koma að stefnumótandi verkefnum með framkvæmdastjórn auk þess að stýra almennum rekstri á Sólheimum,“ segir í tilkynningunni.