Slökkvilið kallað út vegna reyks í Brimborg

Tilkynnt var um eld í verkstæði Brimborgar við Bíldshöfða um klukkan eitt í nótt. Ekki reyndist um eld að ræða heldur mikinn reyk.

Mikill reykur var innandyra en orsökin reyndist vera ónýt reim á loftpressu, að því er fram kemur í dagbók lögreglunnar á höfuðborgarsvæðinu.

Allt tiltækt lið Slökkviliðs höfuðborgarsvæðisins var sent á vettvang vegna tilkynningarinnar og voru sex slökkviliðsbílar og tveir sjúkrabílar mættir á svæðið um tuttugu mínútur yfir eitt. Þetta kemur fram í frétt Ríkisútvarpsins en rétt rúmlega tvö voru allir slökkviliðsmenn farnir af staðnum.