Bubbi segir norska aurgoða sækja að Þorgerði Katrínu

Bubbi Morthens, tónlistar- og veiðimaður, segir Þorgerði Katrínu Gunnarsdóttur sjávarútvegsráðherra undir gríðarlegri pressu í laxeldismálinu, á báða bóga. Þar sem sótt er að henni úr öllum áttum, bæði af veiðimönnum og svo því sem hann kallar norska aurgoða og fulltrúum þeirra.

„Þorgerður Katrín Gunnarsdóttir er undir gríðarlegri pressu í laxeldismálinu það er sótt að henni af fullum þunga af norskum aurgoðum, talsmanni þeirra sem og sveitafélögum og á hinum kantinum eru laxveiðimenn að hamast á henni,“ segir Bubbi og lætur það fylgja sögunni að honum finnist hún standa sig vel í þessu ati og sýni hversu sterkur pólitíkus hún er.

„Vönduð vinnubrögð og yfirveguð það væri óskandi að það næðist lending í þessu máli þar sem sótt er af fullum þunga gegn íslenskri náttúru og íslenska laxinum,“ segir Bubbi en enginn ætti að þurfa að velkjast í vafa um hvar hann stendur í þessu hitamáli sem eru fyrirhugð stóraukin laxeldisáform. Miklir hagsmunir eru í húfi.

Þorgerður segir málið þverpólitískt

Vísir leitaði svara hjá Þorgerði Katrínu, sem fer ekki í grafgötur með að mikill hiti sé í málinu, hvort norskir aurgoðar sæki að henni? Þorgerður Katrín segist ekki ætla að tjá sig með beinum hætti um þrýsting sem hún sætir vegna málsins. En segir það vissulega rétt að ýmsir hafi sett sig í samband við sig vegna málsins en hún ætlar síður en svo að kveinka sér undan því.

„Það eru fulltrúar ýmissa sjónarmiða, verndunar og svo nýtingar hins vegar. Verkefni okkar stjórnmálamenna er síðan að reyna að móta skynssamar reglur um fiskeldi.“

Hitamál

Starfshópur um fiskeldismál, sem Gunnar Bragi Sveinsson þá ráðherra, skipaði undir lok síðasta kjörtímabils, er að störfum nú. Þar eiga sæti fulltrúar veiðifélaga, fiskeldis, umhverfs- og svo sjávarútvegs- og landbúnaðarráðuneytis. Þá kom Gunnar Bragi því einnig svo fyrir að sviðsstjóri fiskeldismála hjá Hafrannsóknarstofnun yrði staðsettur á Ísafirði, ásamt sérfræðingum. Hafrannsóknarstofnun skilaði nýverið niðurstöðum rannsókna þar sem lagst er gegn eldi í Íslafjarðardjúpi.

„Starfshópurinn skilar niðurstöðum um miðjan þennan mánuð og ég mun kynna hana í ríkisstjórn og fyrir atvinnuvega- og umhverfisnefnd þingsins einnig. Ég vil ítreka að ég horfi ekki á þetta mál sem stjórn/stjórnarandstöðumál. Þetta er þverpólitískt og ég hef skynjað mismunandi skoðanir meira og minna í öllum flokkum.“



Einar K. og Bubbi togast á um Þorgerði

Meira vill Þorgerður Katrín ekki um þetta mál segja að svo stöddu. En víst er að sótt er að henni úr öllum áttum af kappi, annars vegar af hálfu veiðimanna hvar Bubbi er fyrirferðarmikill og svo hins vegar af þeim sem vilja stórauka fiskeldið.

Þar er meðal annarra framarlega í flokki framkvæmdastjóri Landssambands fiskeldisstöðva, Einar K. Guðfinnsson, fyrrum samstarfsmaður Þorgerðar Katrínar í ríkisstjórn Geirs H. Haarde, en hann var sjávarútvegsráðherra 2005-2007, jafnframt landbúnaðarráðherra 2007 og svo sjávarútvegs- og landbúnaðarráðherra 2008-2009.