„Skutlari“ tekinn nærri miðborginni

Lögreglan á höfuðborgarsvæðinu stöðvaði för ökumanns nærri miðbæ Reykjavíkur um nótt en hann er grunaður um fólksflutninga gegn gjaldi. Samkvæmt dagbók lögreglu er maðurinn talinn vera einn „skutlara“ sem bjóða far á netinu gegn gjaldi.

Maðurinn var stöðvaður á öðrum tímanum í nótt við gatnamót Hringbrautar og Snorrabrautar. Hann er jafnframt grunaður um sölu á áfengi.

Á Granda var tilkynnt um eld í íbúðargámi skömmu fyrir klukkan tvö og voru bæði lögreglu- og slökkviliðsmenn sendir á vettvang. Maður í annarlegu ástandi var handtekinn grunaður um íkveikju. Hann var vistaður í fangageymslu í nótt.