Ebba Schram ráðin borgarlögmaður

Ebba Schram hæstaréttarlögmaður hefur verið ráðin borgarlögmaður. Borgarráð samþykkti ráðningu hennar í embættið á fundi sínum í dag. Þetta kemur fram í fréttatilkynningu frá Reykjavíkurborg.

Í tilkynningu segir að Ebba hafi frá árinu 2007 starfað sem lögmaður hjá embætti borgarlögmanns, að undanskildum tveimur árum er hún starfaði sem lögmaður á lögmannstofunni LEX . 

Þá segir einnig að frá árinu 2013 hafi Ebba gegnt starfi staðgengils borgarlögmanns og hún hafi rúmlega átta ára reynslu af störfum innan stjórnsýslunnar. Verkefni hennar hafi verið fjölbreytt og snert mörg réttarsvið.

Þá hafi hún m.a. sinnt lögfræðilegri ráðgjöf til borgarstjórnar, borgarráðs, fagráða, stjórnenda, starfsmanna og lögfræðinga á fagsviðum borgarinnar.

„Að teknu tilliti til menntunar og reynslu sem metin var af fyrirliggjandi umsóknargögnum, í starfsviðtölum og með öflun umsagna var Ebba Schram metin hæfasti umsækjandinn í starf borgarlögmanns,“ segir enn fremur í tilkynningunni.