Körfuboltaflugfreyjur tóku á móti strákunum í flugvélinni

Íslenska karlalandsliðið í körfubolta flaug í morgun til Helsinki í Finnlandi þar sem íslenska liðið mun spila sinn fyrsta leik á EM á fimmtudaginn.

Íslensku strákarnir mættu í Leifsstöð uppáklæddir í glæsilegum jakkafötum frá Herragarðinum og fengu þeir flottar móttökur.

Í flugvélinni sjálfri var líka stjanað við strákana okkar sem fengu meðal annars þriggja rétta máltíð í boði Icelandair. Hannes S. Jónsson, formaður KKÍ, sagði frá þessu á fésbókarsíðu sinni.

Það vakti líka athygli að flugfreyjurnar í fluginu voru klæddar í íslenskar landsliðstreyjur en það var líka enn frekari tenging í körfuboltann.

Flugfreyjurnar Annar María Ævarsdóttir, Lovísa Falsdóttir og Helga Hrund Friðriksdóttir eru nefnilega allt fyrrum eða núverandi körfuboltakonur og þær léku allar á sínum tíma fyrir íslensku unglingalandsliðin. Þær hafa líka allar spilað í úrvalsdeild kvenna í körfubolta.

Hannes skrifaði þetta á fésbókarsíðu sína áður en vélin fór í loftið: „Það má segja að EuroBasket2017 hafi formlega hafist i morgun þegar hópurinn hittist i Laugardalnum.  Það voru flottar mótttökurnar sem liðið fékk i Leifsstöð og þökkum við kærlega góðar kveðjur.

Takk Icelandair og Isavia fyrir allan undirbúning og hversu vel tókst til.  Það er körfuboltaáhöfn sem flýgur hópnum út, flugstjóri er Ingvar Ormarsson, flugmaður Eggert Stefánsson, yfirflugþjónn Kristján Möller og flugfreyjur eru Anna Maria Ævarsdóttir, Lovísa Falsdóttir og Helga Hrund Friðriksdottir.“

Flugmaðurinn Eggert er einmitt bróðir Jóns Arnórs Stefánssonar landsliðsmanns.

Hér fyrir neðan má sjá nokkrar myndir sem Hannes tók.