Gasol orðinn stigahæstur í sögu EM

Pau Gasol er orðinn stigahæsti leikmaður í sögu Evrópumótsins í körfubolta.

Þegar Gasol setti niður þrist um miðjan 2. leikhluta í sigri Spánar á Ungverjalandi í dag tók hann fram úr Tony Parker á stigalistanum.

With this basket @PauGasol became the new FIBA #EuroBasket All-Time leading scorer!

#LegendGasol #EuroBasket2017 pic.twitter.com/fq0yy3KkY8

— FIBA (@FIBA) September 7, 2017

Parker skoraði 1104 stig fyrir Frakkland á sínum tíma. Gasol er núna kominn með 1111 stig.

Gasol var í 3. sæti stigalistans fyrir EM í ár en í riðlakeppninni tók hann bæði fram úr Parker og Dirk Nowitzki. Grikkinn Nikos Galis er í 4. sæti stigalistans. Galis er hins vegar efstur á listanum yfir þá leikmenn sem hafa skorað flest stig að meðaltali í leik á EM (31,2 stig).

Gasol er að spila á sínu sjöunda Evrópumóti. Hann hefur þrisvar sinnum orðið Evrópumeistari með spænska landsliðinu, tvisvar sinnum unnið til silfurverðlauna og einu sinni brons. Spánverjar eru ríkjandi meistarar og hafa því titil að verja.

Gasol var valinn besti leikmaður EM 2009 og 2015 og þá hefur hann þrívegis verið stigakóngur mótsins.

Gasol og félagar mæta Tyrklandi í 16-liða úrslitum EM á sunnudaginn.