Martin: Er búinn að lofa öllum liðsfélögunum að vinna Frakkana

Martin Hermannsson spilaði í frönsku b-deildinni síðasta vetur og fékk í sumar hjá franska úrvalsdeildarliðinu Chalons-Reims. Hann spilar því áfram í Frakklandi næsta vetur.

Mótherjar dagsins hjá íslenska körfuboltaliðinu í Helsinki eru einmitt Frakkarnir og þar ætlar Martin að gera sitt til að ná góðum úrslitum.

„Ég er búinn að lofa öllum liðsfélögunum að vinna Frakkana og ætla að halda í það loforð,“ sagði Martin eftir tapleikinn gegn Póllandi í gær en hvernig munu strákarnir fara af því að vinna Frakkana í dag?

„Það er rosalega erfitt enda lið með NBA-leikmenn í öllum stöðum. Þeir eru stórir og sterkir og frábærir sóknarlega. Þeir eru reyndar aðeins verri varnarlega en ég er samt ekki að segja að þeir séu lélegir í vörn,“ sagði Martin.

„Við þurfum að grafa djúpt í myndböndin með þeim til að finna þeirra veikleika og eitthvað sem gæti hentað okkur vel,“ sagði Martin.

Finnarnir unnu Frakkana í fyrstu umferðinni en geta íslensku strákarnir reynt að gera það sem þeir gerðu?

„Finnarnir eru með allt öðruvísi lið en við og með meiri hæð. Vonandi bara vanmeta Frakkarnir okkur alltof mikið. Við höfum engu að tapa og ætlum bara gefa allt í þetta. Talandi ekki um ef þriggja stiga skotin fara að detta því þá getur allt gerst,“ sagði Martin.

„Við eigum einn leik frá lukkuguðunum inni. Það hefur ekkert verið að falla með okkur og við fáum enga virðingu frá dómurunum. Allir 50-50 dómar falla þeirra megin og það er erfitt fyrir okkur, lið sem þarf á því að halda. Svo þegar við vorum að ná boltanum þá missum við hann klaufalega og þeir setja niður þriggja stiga skot. Það var köld tuska í andlitið aftur og aftur. Það var vont og þá vorum við fljótir að brotna,“ sagði Martin en hann er sammála því að það sé gott fyrir íslenska liðið að fá strax leik á morgun aftur.

„Mér fannst dagurinn í gær alltof lengi að líða. Ég held að það sé gott fyrir okkur að fá leik strax á morgun (í dag). Frakkarnir fara kannski í meiri leik á eftir (á móti Grikkjum í gær) og þurfa að hafa meira fyrir þessu. Þeir hafa styttri tíma til að jafna sig sem vonandi nýtist okkur eitthvað,“ sagði Martin en Frakkar unnu átta stiga sigur á Grikkjum í gær, 95-87.