Hvetja fólk til að hætta að nota sogrör

Björn S. Gunnarsson, vöruþróunarstjóri MS segist hugleiða það að fjarlægja hin mjög svo óumhverfisvænu drykkjarrör af umbúðum G-mjólkurinnar. Þetta sagði Björn í samtali við Reykjavík síðdegis. Dóra Magnúsdóttir, verkefnisstjóri átaks um plastleysi, hvetur almenning til að taka höndum saman og hverfa frá sogrörunum.

Vísir hafði samband við Dóru Magnúsdóttur, landfræðing, sem er ein átta kvenna sem stendur að átakinu Plastlaus september en hún er jafnframt verkefnisstjóri átaksins en hún hvetur Björn eindregið til þess að hætta með sogrörin. Þá segir hún einnig sé mikilvægt að almenningur átti sig á skaðsemi þeirra, þau valdi mikilli umhverfismengun og þau séu í raun algjör óþarfi.

Björn sagði í útvarpsþættinum að MS hefði áður gert tilraun til þess að fjarlægja drykkjarrörið af G-mjólkurfernunum en við dræmar undirtektir neytenda. „Þá fengum við nú athugasemdir við það frá neytendum. Það virðist sem sumir séu nokkuð færir í að nota rörin til að hella út í kaffið.“

Björn segir að bæði fréttir af umhverfismengun Bandaríkjamanna og átakið Plastlaus september hafi orðið til þess að fyrirtækið hugleiði nú að fjarlægja sogrörin. Til þess að bregðast við þessu hyggst Björn leggja könnun fyrir neytendur til þess að athuga hvort vilji sé fyrir hendi.

„Ég held að almenningur sé miklu meðvitaðri um umhverfisáhrif og neikvæð áhrif umbúða og það er náttúrulega ljóst að það þarf að minnka umbúðamagnið og efla endurvinnslufarvegi,“ segir Björn að lokum.

Dóra segir almenning mjög háðan því að sjúga drykki en bendir á að það sé í rauninni algjör óþarfi.

Ef ekkert verður að gert verða fleiri sogrör fleiri en fiskarnir í sjónum árið 2050. Jarðarbúar nota um 500 milljón einnota drykkjarröra á dag.

Dóra stingur upp á einfaldri hugarfarsbreytingu: „Þegar við fáum okkur gosdrykk heima hjá okkur stingum við ekki rör í glasið okkar en það er eins og allt breytist við að fara á veitingastað þá stingur fólk plaströri ofan í glasið og sýgur drykkinn eins og eitthvað smábarn,“ segir Dóra sem segir þetta vera óþarfa.

„Þetta er bull sem við erum búin að venja okkur á og bull sem er búið að „normalíserast.“ Við þurfum að kveikja á perunni og hugsa: „heyrðu, ég þarf ekkert plaströr í hvert skipti sem ég fæ mér drykk á veitingastað, ég bara drekk þetta eins og heima hjá mér,“ segir Dóra.

Hún segir að átakið hafi gangið vonum framar: „Þetta hefur verið meiri og skemmtilegri vinna en við áttum von á. Við höfum samskipti við fólk í gegnum vefsíðuna og samfélagsmiðla.“ Þá hafa aðstandendur átaksins staðið fyrir ýmiss konar viðburðum.

Dóra segir að sífellt fleiri sveitarfélög séu að hugleiða plast- og plastpokaleysi. „Það er svona stóra einfalda skrefið sem flestir geta tekið,“ bendir Dóra á.

Hvers vegna er þessi tregða við að hreinlega banna plastpoka?

„Það er kannski betra að vekja fólk til vitundarvakningar. Bann fyrir fólk sem hefur ekki vaknað til meðvitundar hljómar kannski eins og forræðishyggja. Ef þú ert búinn að átta þig á því hvað þetta er mikið vandamál og hvað það er auðvelt að sleppa plastpokunum þá finnst þér bannið bara sjálfsagt og eðlilegt,“ segir Dóra til útskýringar.

Ég held það skipti miklu máli að hreyfa við og hrífa almenning með í þessari bylgju til þess að koma breytingum á. Það er það sem ég legg mikla áherslu á og okkur hefur tekist að hreyfa við ofboðslega mörgum.

Hvað gerist síðan í október?

„Þá er fólk vaknað. Þá er búið að hnippa í þig, þú búinn að velta fyrir þér vandanum og verða þér úti um margnota poka og þá detturðu ekkert aftur í sama farið,“ segir Dóra.