Strætóstjóri svo upptekinn í símanum að hann gleymdi að stoppa

Inga Steinunn Björgvinsdóttir birti um helgina mynd af strætóbílstjóra nokkrum á Facebooksíðu sinni sem vakið hefur nokkra athygli og verið dreift rúmlega 70 sinnum. Þar má sjá að bílstjórinn er önnum kafinn við að skoða snjallsíma sinn og með fylgir frásögn Ingu.

Þar greinir hún frá því að þessi „fyrirmyndar“ bílstjóri hafi setið við stýrið á leið 5 á laugardag klukkan 18:46, í Norðlingaholti.

„Hann var svo upptekinn við að skrifa/skoða sms að hann keyrði fram hjá stoppistöðinni og stoppaði ekki fyrr en dóttir mín kallaði à hann. Þess ber að geta að þessi stoppistöð er við gangbraut þar sem göngustígur liggur frá leiksvæði skólans og er því fjölfarin af börnum hverfisins. Þori ekki að hugsa til þess ef einhver hefði verið á leiðinni yfir gangbrautina á þessum tímapunkti,“ segir Inga Steinunn.

Hún beinir tilmælum til Strætó, að þeir verði einfaldlega að gera betur. Því þeim þar sé treyst fyrir lífi og limum borgaranna.

Guðmundur Heiðar Helgason, markaðs- og upplýsingafulltrúi Strætó hefur brugðist við þessari opinberu fyrirspurn og segir að hjá Strætó sé svona athæfi litið mjög alvarlegum augum.

„Við vitum hvaða bílstjóra um er að ræða og það verður rætt við hann. Ég þakka þér fyrir að deila þessari mynd með okkur, þetta er hegðun sem við viljum útrýma sem allra fyrst,“ segir Guðmundur í þræðinum við færslu Ingu Steinunnar.