Bilzerian myndaði sjálfan sig á flótta í Las Vegas: „Sá konu fá skot í höfuðið“

Glaumgosinn og pókerspilarinn Dan Bilzerian er þekktur fyrir skrautlegan lífstíl en Bilzerian er 36 ára Bandaríkjamaður af armenskum ættum.

Hann er einna þekktastur fyrir Instagram reikning sinn en hann er á topp 50 yfir þá sem eru með flesta fylgjendur forritsins. Þar deilir hann myndum af háfleygum lífstíl sínum.

Bilzerian var einn af gestum tónlistarhátíðar í Las Vegas á sunnudagskvöldið. Stephen Paddock drap að minnsta kosti 59 manns og særði á sjötta hundrað manna á tónleikum Jason Aldean. Paddock skaut úr byssu frá hótelherbergi sínu af 32. hæð Mandalay-hótelsins.

Á hótelherbergi þaðan sem hann skaut á fólkið fannst fjöldi byssa til viðbótar. Bilzerian myndaði sjálfan sig á flótta á tónleikunum og deildi því á Instagram-reikningi sínum.

Bilzerian setti umrædd myndbönd inn á það sem kallast „my story“ svo það eyðist út eftir 24 klukkustundir. Hér að neðan má sjá þennan frægasta glaumgosa heims flýja af svæðinu en þar segist hann hafa séð konu fá skot í höfuðið.