Ný persóna eftir að hafa fengið gaskút í höfuðið

Konu, sem fékk slæma áverka á höfði þegar gaskút var kastað á tjald þar sem hún lá sofandi á útihátíð, hafa verið dæmdar ríflega 3,7 milljóna króna bætur úr ríkissjóði.

Fram kemur í dómi Héraðsdóms Reykjavíkur að konan hafi verið gestur á útihátíð á Rangárvöllum við Hellu í júlí 2012. Hún bar fyrir dómi að hún og maður sem með henni var hefðu farið að sofa í tjaldi sínu. „Hún hefði vaknað um morguninn og fundið að hún var alblóðug og með skurð á enninu. Þá hafi verið blóð á tjaldhimninum,“ segir um frásögn konunnar.

Þá segir konan að vitni á staðnum hafi komið til hennar og bent á menn sem hefðu verið að kasta gaskút á milli sín nálægt tjaldinu. „Hún hefði farið og talað við mennina og þeir hefðu beðið hana afsökunar.“

Konan kærði atvikið til lögreglu sem felldi málið niður. Jafnframt leitaði hún til bótanefndar ríkisins sem sagði óvissu um málsatvik og hafnaði kröfu hennar árið 2015. Stefndi hún þá ríkinu. Fyrir dómi var lagt fram vottorð taugasálfræðings um persónuleikabreytingar sem orðið höfðu á konunni vegna áverkans.

„Áður hafi hún verið skvísa og farið út á meðal fólks og tekið þátt í viðburðum, en nú nenni hún ekki að mála sig eða taka þátt í viðburðum, fari minna út. Það spili inn í hve þreytt hún verði þegar áreiti er mikið,“ segir í vottorði taugasálfræðingsins sem kveður hana bæði hafa gefist upp í líkamsrækt og hestamennsku.

Þá kvarti konan undan minnis- og einbeitingarerfiðleikum. „Á ferðalögum verði hún mjög þreytt og þurfi þá mikinn svefn að þeim loknum. Hún reyni því að ferðast sem minnst.“

Sömuleiðis séu til staðar líkamleg einkenni eins og dofi í andliti og höfði, þrálátur höfuðverkur, stirðleiki í hálsi, úthaldsskortur, skert lyktarskyn, jafnvægiserfiðleikar, svimi og yfirliðakennd. Hún eigi erfitt með að átta sig á hvað fólk sé að segja, verði pirruð og hafi minni sjálfstjórn. Hún hafi dregið sig í hlé félagslega. „Að sumu leyti hafi lífið verið tekið frá henni.“

Tveir menn sem voru að kasta gaskútnum á milli sín neituðu báðir að kúturinn hefði lent á tjaldi. Sjúkragæslumenn sem komu á staðinn sögðu að á vettvangi hefði verið talað um að einhver hefði lamið í tjaldið með áhaldi, gaskút eða öðru eða að gaskút hefði verið kastað.

Tveir dómkvaddir matsmenn sögðu að atburður eins og konan lýsti væri vel til þess fallinn að valda þeim einkennum sem hún hafi lýst.

Í málsvörn ríkisins sagði að ekki væri sannað að refsiverður verknaður hefði verið framinn og hann valdið áverkum konunnar. Þar sem ekki hafi verið höfðað sakamál á hendur þeim grunuðu sé ekki hægt að byggja á því að þeir hafi valdið áverkunum. Til þess að heimilt sé að greiða bætur þurfi ríkið að eiga kröfu á einhvern sem framið hafi refsiverðan verknað.

Dómurinn segir hins vegar að nægar líkur hafi verið leiddar að því að konan „hafi hlotið meiðsl sín af því að verða fyrir gaskút sem óþekktur aðili hafi kastað frá sér og að háttsemi hans yrði metin til sakar“.