Stefnu Krónunnar vegna brauðbars vísað frá

Héraðsdómur Suðurlands hefur vísað frá dómi kröfu Krónunnar er varðar ákvörðun Heilbrigðiseftirlits Suðurlands þess efnis að brauðmeti í verslun Krónunnar á Selfossi skuli varið með umbúðum eða öðrum hætti sem tryggi matvöruna gegn mengun.

Heilbrigðiseftirlitið gerði athugasemd við að óvarið brauð væri á boðstólum í versluninni því ekkert hindri það að aðilar hnerri eða hósti yfir brauðið.

Heilbrigðiseftirlitið fór síðar í tvær heimsóknir í verslun Krónunnar á Selfossi. Í október á síðasta ári sagði eftirlitið að óvarin brauð yrðu tekin úr sölu ef ekki yrði gripið til úrbóta, og þegar eftirlitsmenn komu öðru sinni, til að fylgja eftir athugasemdum sínum, höfðu starfsmenn Krónunnar verið búnir að setja brauðið í poka á meðan heimsókninni stóð.

Krónan ákvað á endanum, eða í febrúar, að verða við kröfum eftirlitsins og breytti innréttingum í samræmi við kröfur.

Töldu forsvarsmenn verslunarinnar þó að að verulegir annmarkar hafi verið á ákvörðun heilbrigðiseftirlitsins og fóru þeir fram á bætur vegna þessa. Breytingar á versluninni hafi kostað 350 þúsund auk ónefnds sölutaps vegna minni sölu brauðmetis í lokuðum innréttingum.

Dómur í málinu féll í gær. Var stefnunni vísað frá en héraðsdómur taldi stefnu Krónunnar ekki fulllnægja meginreglu um skýra og ljósa kröfugerð.

„Í þeim hluta dómkrafna stefnanda er lýtur að ógildingu ákvörðunar stefnda Heilbrigðiseftirlits Suðurlands er hins vegar hvorki tilgreint hvaða ár né hvaða dag hin umdeilda ákvörðun á að hafa verið tekin. Að þessu leyti er ekki samræmi milli dómkröfunnar og málatilbúnaðar stefnanda. Þá eru í málatilbúnaði stefnanda engin rök færð fram um ástæður þessa ósamræmis þrátt fyrir að gögn þau sem stefnandi byggir málsókn sína á hafi gefið tilefni til þess,“ að því er segir í dómi Héraðsdóms.

Dóm héraðsdóms má sjá hér.