Telja lögreglumenn á vettvangi hafa brugðist rétt við

Lögreglan lítur svo á að lögreglumenn sem höfðu afskipti af stúlku í miðborg Reykjavíkur aðfaranótt laugardags hafði brugðist rétt við. Dyravörður á skemmtistað í Reykjavík taldi grun leika á um að henni hafði verið byrlað ólyfjan en taldi lögregluna hafa sýnt af sér sinnuleysi gagnvart stúlkunni.

Hrafnkell Ívarsson, skrifaði færslu á Facebook, þar sem hann lýsti samskiptum sínum við lögreglu. Sagðist hann hafa hringt í Neyðarlínuna vegna stúlku í mjög annarlegu ástandi. Hrafnkell, sem starfað hefur sem dyravörður í sex ár, taldi ljóst að eitthvað annað en mikil ölvun væri valdur af hegðun hennar.

„Eftir að hafa útskýrt málið fyrir lögreglukonunum sem sátu frammi í bílnum mætti mér ekkert annað en yfirlæti,“ skrifaði Hrafnkell sem gagnrýndi lögreglukonurnar fyrir að hafa ekki stigið úr lögreglubílnum til þess að leggja mat á ástand konunnar.

Í yfirlýsingu vegna málsins frá Lögreglunni á höfuðborgarsvæðinu segir að lögreglan taki slíkar ábendingar alvarlega og að málsatvik hafi verið skoðuð ítarlega.

„[B]æði var kallað eftir skýringum lögreglumanna á vettvangi og farið yfir myndefni úr eftirlitsmyndavélum á svæðinu,“ segir í yfirlýsingunni.

Þar segir einni að lögregla hafi í tvígang haft tal af stúlkunni og boðið fram aðstoð sína. Stúlkan hafi hins vegar ekki kært sig um aðstoð lögreglu og haldið að lokum sína leið fótgangandi úr miðbænum ásamt vinkonu.

„Embættið lítur svo á að lögreglumenn á vettvangi hafi brugðist rétt við, en hafa skal hugfast að í tilvikum sem þessum er gjarnan haft áfram auga með viðkomandi, þ.e. með aðstoð eftirlitsmyndavéla,“ segir í yfirlýsingunni.

Er dyraverðinum þakkað fyrir að vekja athygli á málinu, það sýni að fólk sé á varðbergi og standi ekki sama. Þá harmar lögrega að upplifun hans af samskiptum við lögreglumenn á vettvangi hafi ekki verið betri.