Dúkkaði aftur upp í lífi fyrrverandi skólasystur sinnar og nauðgaði henni

Héraðsdómur Reykjaness hefur dæmt mann í þriggja ára fangelsi fyrir nauðgun. Samkvæmt vitnisburði brotaþola voru hún og ákærði saman í grunnskóla en hann á að hafa nauðgað henni fyrst þegar þau voru í 10. bekk. Ekki var ákært í því máli. Hlé hafi svo orðið á samskiptum þeirra þangað til að ákærði setti sig aftur í samband við brotaþola í aðdraganda seinna brotsins, sem framið var í febrúar 2016 og ákærði var að endingu sakfelldur fyrir. Hvorki ákærði né brotaþoli höfðu náð átján ára aldri þegar brotið var framið.

„Þú vildir þetta, þú veist það“

Samkvæmt gögnum málsins er aðdragandi brotsins sá að ákærði hafði samband við brotaþola í febrúar 2016 í gegnum Facebook. Gekk ákærði nokkuð á eftir brotaþola og spurði ítrekað hvort hann mætti koma og sýna henni teikningu sem hann vildi álit hennar á. Brotaþoli reyndi að komast undan því að fá ákærða í heimsókn en eftir mikla ýtni frá ákærða gaf brotaþoli samþykki sitt fyrir að kíkja á myndina.

Þegar ákærði kom heim til brotaþola var hann ekki með neina mynd, að því er kemur fram í frásögn brotaþola. Hann hafi strax farið að ganga á hana. Brotaþoli hafi svo barist á móti honum í tvær klukkustundir og m.a. ýtt honum og barist með hnefum en hann náð að nauðga henni. Hann hafi sagt þegar hann fór: „Þú vildir þetta, þú veist það.“

Ákærði hélt því fram fyrir dómi að samfarirnar hefðu farið fram með samþykki brotaþola.

Sakar ákærða um aðra nauðgun

Í vottorði frá Neyðarmóttöku þolenda kynferðisofbeldis segir í stuttri frásögn af hálfu brotaþola að ákærði hafi verið að áreita hana frá því að þau voru saman í grunnskóla en þau voru skólasystkini. Hann hafi króað hana af þegar þau voru í 10. bekk inni á salerni og nauðgað henni. Leiðir þeirra hafi skilið í framhaldsskóla.

Í aðdraganda brotsins í febrúar 2016 hafi ákærði hins vegar sett sig aftur í samband við hana, sent henni skilaboð á Snapchat þar sem hún „blokkaði“ hann. Þá hafi ákærði byrjað að senda henni skilaboð í gegnum Facebook og leitað uppi vinnustað hennar.

Í dómnum kemur fram að framburður ákærða hafi þótt afar ótrúverðugur í ljósi framburðar brotaþola og vitna sem styðja framburð hennar.

Ákærði var dæmdur til að sæta fangelsi í þrjú ár fyrir nauðgunina sem framin var árið 2016 og til greiðslu alls sakarkostnaðar, rúma 1,4 milljón króna. Þá var honum auk þess gert að greiða brotaþola 1,5 milljón króna í miskabætur.

Dóminn má lesa í heild sinni hér.