Yfirburðasigur Önnu Maríu í varaformannskosningu

Anna María Gunnarsdóttir hefur verið kjörin varaformaður Kennarasambands Íslands. Fjórir félagsmenn KÍ buðu sig fram í embættið og féllu atkvæði þannig:

Anna María Gunnarsdóttir hlaut 1.653 atkvæði eða 52,86%

Ásthildur Lóa Þórsdóttir hlaut 845 atkvæði eða 27,02%

Heimir Björnsson hlaut 259 eða 8,28%

Simon Cramer Larsen hlaut 135 atkvæði eða 4,32%

Auðir seðlar voru 235 eða 7,52%

Á kjörskrá voru 10.307 og greiddu 3.127 atkvæði, eða 30,34%. Atkvæðagreiðslan var rafræn, hófst klukkan 9.00 fimmtudaginn 7. desember og lauk klukkan 14 í dag, miðvikudaginn 13. desember.

Anna María Gunnarsdóttir tekur við embætti varaformanns af Aðalheiði Steingrímsdóttur á VII þingi Kennarasambandsins sem fram fer í apríl á næsta ári.

Upphaflega voru sex í framboði til varaformanns. Tveir frambjóðendur drógu framboð sitt til baka í ljósi þess að nýkjörinn formaður KÍ, Ragnar Þór Pétursson, sætir tuttugu ára gamalli ásökun um að hafa sýnt nemanda klám á sínum tíma. Ragnar Þór þvertekur fyrir að nokkuð slíkt hafi gerst.