Jón Axel stórkostlegur er Davidson tapaði gegn Kentucky | Myndbönd

Jón Axel Guðmundsson átti stórleik í nótt fyrir Davidson-skólann er hann tapaði, 78-73, gegn stórliði Kentucky í frábærum leik í úrslitakeppni NCAA-deildarinnar sem kallast March Madness.

Jón Axel var stigahæstur í liði Davidson í leiknum með 21 stig. Hann setti niður sex þriggja stiga körfur. Til samanburðar þá hitti enginn í liði Kentucky úr þriggja stiga körfu í leiknum.

Kentucky er einn stærsti skólinn í Bandaríkjunum og framleiðir leikmenn fyrir NBA-deildina. Þar er alltaf valinn maður í hverju rúmi og frábær frammistaða hjá Jóni og félögum að standa vel í þeim.

Davidson var tíu stigum undir í fyrri hálfleik en náði að koma til baka í síðari hálfleik en það dugði ekki til.

Jón Axel var einn tveggja leikmanna Davidson sem spilaði allan leikinn. Hann endaði næststigahæstur á gólfinu en það aðeins Kevin Knox hjá Kentucky sem skoraði meira en skoraði 25 stig í leiknum.