Einar Árni tekur við Njarðvík

Einar Árni Jóhannsson hefur tekið við karlaliði Njarðvíkur en Körfuknattleiksdeild félagsins staðfesti þetta í dag.

Einar Árni gerði Njarðvík að Íslandsmeisturum árið 2006 en það var í síðasta skipti sem Njarðvík varð Íslandsmeistari. Síðastliðin þrjú árin hefur Einar stýrt liði Þórs í Þorlákshöfn en hefur nú ákveðið að snúa til baka.

Við samningagerðina nú fyrr í dag bauð formaðurinn , Friðrik Pétur Ragnarsson, Einar Árna velkominn.

„Við fögnum því innilega að fá jafn reyndan þjálfara og Einar við stýrið en það er hugur í okkur Njarðvíkinum sem fyrr. Í Einari þekkjum við sterkan þjálfara sem hefur um árabil gert góða hluti í Ljónagryfjunni.“

Njarðvík ákvað að endurnýja ekki samning sinn við Daníel Guðna Guðmundsson sem hafði stýrt liðinu síðustu tvö tímabilin.