Lögregla girðir af sveitabæ í Biskupstungum

Lögregla hefur girt af sveitabæ í Biskupstungum og hefur lögreglulið verið að störfum á svæðinu í dag. Á níunda tímanum í morgun var tilkynnt um andlát manns í heimahúsi í Árnessýslu. Tveir menn eru í haldi lögreglu vegna málsins, tilkynnandinn sjálfur ásamt öðrum manni sem einnig var á vettvangi.

Oddur Árnason yfirlögregluþjónn hjá lögreglunni á Suðurlandi segir í samtali við Vísi að rannsókn málsins standi enn yfir. Búið sé að ná sambandi við flesta aðstandendur hins látna. Þá segir hann ekki tímabært að segja til um það hvort andlát mannsins hafi borið að með saknæmum hætti.

Tæknideild Lögreglunnar á höfuðborgarsvæðinu aðstoðar rannsóknardeild lögreglunnar á Suðurlandi við rannsókn málsins.