Segir mynd­band sýna börn sniffa gas í bú­stað með starfs­mönnum með­ferðar­heimilis

Jóhannes Kr. Kristjánsson, blaðamaður, ritar opið bréf til Halldórs Haukssonar, sviðsstjóra meðferðarsviðs Barnaverndarstofu í Fréttablaðið í dag. Jóhannes hefur undanfarin ár verið áberandi í baráttunni fyrir betri úrræðum fyrir börn og ungmenni sem glíma við fíknivanda en dóttir hans, Sigrún Mjöll, lést árið 2010 aðeins 17 ára gömul úr of stórum skammti af morfíni.

Í bréfinu, sem ber yfirskriftina „Þú veist þetta allt“, gagnrýnir hann Halldór og þá miklu áherslu sem hann hefur lagt á MST-meðferðarkerfið en eins og greint hefur verið frá hefur fjölda meðferðarheimila fyrir börn og ungmenni með fíknivanda verið lokað undanfarin ár.

Jóhannes segir að á sama tíma hafi Halldór lagt alla sína krafta í í MST-meðferðarkerfið þrátt fyrir að hann viti að það virki ekki fyrir börn sem eru í lífshættulegri neyslu fíkniefna:

MST-kerfið í eigu bandarísks fyrirtækis sem Barnaverndarstofa greiðir þóknanir fyrir að nota

„Síðustu ár hefur þú látið loka meðferðarheimilum barna víðsvegar um landið. Á sama tíma hefur þú lagt alla þína krafta í MST-meðferðarkerfið sem gengur út á að barnið fái meðferð í sínu umhverfi – inni á heimilinu. Þú veist það jafnvel og ég að MST-kerfið virkar ekki fyrir börn sem eru komin í lífshættulega neyslu fíkniefna. Þú veist að MST getur virkað ágætlega fyrir börn sem eru á fyrstu stigum hegðunarvanda og það gæti hentað ágætlega sem eftirmeðferðarúrræði fyrir börn sem eru að koma úr langtímameðferð. Þú veist líka að MST-meðferðarkerfið er í eigu bandarísks fyrirtækis sem Barnaverndarstofa greiðir þóknanir fyrir að nota.

Þú veist að það er til myndband af börnunum á meðferðarheimilinu Lækjarbakka sem voru að sniffa úr gaskút í helgarleyfi í sumarbústað með starfsmönnum meðferðarheimilisins. Ég veit að Barnaverndarstofa fékk upplýsingar um neyslu barnanna en kaus að láta barnaverndarnefndir þeirra sem áttu í hlut ekki vita,“ segir í bréfi Jóhannesar.

„Þú hefur byggt upp kerfi sem stjórnað er af örfáum einstaklingum“

Hann fullyrðir jafnframt að starfsmennirnir sem vinni á meðferðargólfinu segi að MST-meðferðarkerfið virki ekki fyrir börn sem séu með mjög erfiðan hegðunarvanda eða börn í lífshættulegri neyslu fíkniefna:

„Þeir segja að það vanti sérhæfð meðferðarheimili. Þeir segja að ekki sé hlustað á þeirra tillögur um úrbætur í meðferðarkerfinu. Þeir segja að þú og aðrir starfsmenn Barnaverndarstofu þaggið niður í þeim þegar þeir vilji gagnrýna meðferðarkerfið sem þú stjórnar.

Veistu hvað þú ert búinn að gera, Halldór? Þú hefur byggt upp kerfi sem stjórnað er af örfáum einstaklingum sem sitja við skrifborð í turni Barnaverndarstofu og gefa ordrur um hitt og þetta án samráðs við mikilvæga starfsfólkið sem vinnur við að reyna að bjarga börnunum okkar. Það fólk er að gefast upp í starfi sínu – það eina sem heldur í það eru þessir pínulitlu sigrar þegar það sér á eftir barni nokkuð visst um að það muni pluma sig næstu mánuði og jafnvel til langframa.

Ég styð starfsfólkið í meðferðarkerfinu sem er að vinna með erfiðustu börn landsins oft við bágbornar aðstæður. Ég styð samtökin Olnbogabörn og Sigvalda og Öddu sem eru nú að berjast fyrir lífi sonar síns. Ég stóð einu sinni í þeirra sporum þegar ég var að reyna að bjarga stelpunni minni. Það tókst því miður ekki en þú hefur nú tækifæri til að gera allt sem í þínu valdi stendur til að byggja upp meðferðarkerfi sem hefur það eina markmið að bjarga börnunum okkar. Þú veist að það átt þú að gera, Halldór,“ segir í bréfi Jóhannesar sem lesa má í heild sinni hér.

Vísir hefur sent fyrirspurn til Halldórs Haukssonar, sviðsstjóra meðferðarsviðs Barnaverndarstofu, og óskað eftir viðbrögðum hans vegna bréfs Jóhannesar.