Ætla að koma á fót karlaathvarfi

Samtök um karlaathvarf voru formlega stofnuð í dag þegar nokkrir af forsvarsmönnum samtakanna komu saman að húsnæði hlutafélagaskrár á Laugavegi 166 til að leggja inn formlega skráningu. Þetta kemur fram í tilkynningu frá samtökunum.

Þá segir í tilkynningu að þeir sem standi að baki Samtökum um karlaathvarf séu í forsvari fyrir nokkur félög sem kennd eru við hinar svokölluðu „feðrahreyfingar“, þar á meðal aðgerðahópinn #DaddyToo.

„Það er von okkar að sem flest áhugafólk og sérfræðingar sem láta sig þessi mál varða muni koma að borðinu með okkur til að byggja starfið upp. Þetta er grettistak og mikil þörf fyrir slíka þjónustu fyrir hin fjölmörgu karlkyns fórnarlömb ofbeldis og kúgunar,“ segir í tilkynningu.

Þá kemur auk þess fram í tilkynningu að tilgangur samtakanna sé að reka athvarf fyrir karla og börn þeirra sem hafa orðið fyrir andlegu, líkamlegu eða kynferðislegu ofbeldi. Þá ætla samtökin að veita ráðgjöf og upplýsingar og „efla fræðslu og umræðu um ofbeldi sem beinist gegn körlum og börnum þeirra.“

Samtökin segjast einnig ætla að „leiðrétta ranghugmyndir um að ofbeldi sé kynbundið“ enda séu karlmenn ekki síður þolendur ofbeldis heldur en konur. Samtökin munu auk þess berjast fyrir rétti karlmanna til að umgangast börn sín.

Stjórn samtakanna skipa Huginn Þór Grétarsson, Gunnar Kristinn Þórðarson, Friðgeir Örn Hugi Ingibjartsson og Kristinn Sæmundsson.