Vill að þjóðarsjóðurinn verði að veruleika á þessu ári

Bjarni Benediktsson, fjármála-og efnahagsráðherra, vill sjá þjóðarsjóð verða að veruleika í ár, á 100 ára afmæli fullveldis Íslands. Þetta kom fram í ávarpi ráðherrans á ársfundi Landsvirkjunar sem hófst klukkan 14 í dag en í síðasta mánuði var greint frá því að stefnt væri að frumvarpi um þjóðarsjóðinn næsta vetur.

Yfirskrift fundarins er „Á traustum grunni“ en fyrirtækið, sem er að fullu í eigu ríkisins, stendur vel. Þannig hefur hagnaður þess aldrei verið meiri en á árinu 2017 þegar hann nam 11,2 milljörðum króna.

Í ávarpi sínu í dag rifjaði Bjarni upp að hann hefði fyrst viðrað hugmyndina um þjóðarsjóð á ársfundi Landsvirkjunar árið 2016. Í sjóðinn yrði safnað arðgreiðslum Landsvirkjunar sem og annarra orkufyrirtækja í eigu ríkisins.

Sjá einnig:Bein útsending: Ársfundur Landsvirkjunar

„Það má segja að hér hafi hið fornkveðna gilt, það er að segja að góðir hlutir gerist stundum hægt en það ber ekki að skilja svo að það hafi ekkert gerst í millitíðinni,“ sagði Bjarni á fundinum í dag.

Hann nefndi að starfshópur um þjóðarsjóð hafi verið að störfum og að stjórnarflokkarnir væru sammála um að stofna ætti slíkan sjóð. Það birtist í stjórnarsáttmálanum.

„En ég hef líka alltaf lagt áherslu á að það að það geti tekist um slíkt verkefni sem allra breiðust sátt, sérstaklega um útfærsluna og fyrirkomulag sjóðsins. En ég get ekki annað sagt en að ég myndi gjarnan vilja sjá þessa hugmynd verða að veruleika, að við myndum innsigla þessa hugmynd, á þessu aldarafmæli fullveldisins,“ sagði Bjarni.

Hann sagði hugmyndina um þjóðarsjóðinn eiga sér rætur í mjög sterkum rekstri Landsvirkjunar. Þannig hafi fjárhagsleg staða fyrirtækisins aldrei verið betri og niðurgreiðsla lána verið umtalsverð undanfarin ár samhliða miklum framkvæmdum. Þessi góða staða gerði það að verkum að á næstum árum gætu umtalsverðar arðgreiðslur runnið til eiganda fyrirtæksins, það er ríkisins.