Dóra Björt: „Þetta er mjög Píratalegur sáttmáli“

Dóra Björt Guðjónsdóttir, oddviti Pírata í Reykjavík, er ánægð með stöðu mála að loknum viðræðum um myndun meirihluta í borginni. „Við Píratar erum rosalega ánægð með þetta. Þetta er mjög Píratalegur sáttmáli að mörgu leyti svo við erum allavega rosalega sátt. Þetta gekk vel.“ Hún segir að viðræðurnar hefðu ekki reynst erfiðar því mikil samstaða hefði verið um grunnmálefni. Þegar uppi er staðið væri meira sem sameinaði flokkana en sundraði.

Fréttamaður okkar, Jóhann K. Jóhannsson, tók viðtal við Dóru Björt eftir blaðamannafund sem haldinn var í morgun klukkan hálf ellefu. Samfylking, Píratar, Vinstri græn og Viðreisn undirrituðu málefnasamning meirihlutans fyrir kjörtímabilið.

Dóra Björt mun gegna embætti forseta borgarstjórnar fyrsta ár kjörtímabilsins. „Þetta er mjög spennandi og ég vonast til þess að verða sameinandi forseti. Við Píratar erum mjög upptekin af samræðustjórnmálum og ég hyggst standa fyrir því.“

Húsnæðismálin fyrst á dagskrá

Spurð að því hvar megi sjá fyrstu fótspor nýs meirihluta svarar Dóra Björt: „Ég held að það verði mjög mikilvægt að leggjast strax yfir það hvernig við ætlum að taka á húsnæðisvandanum sem við stöndum frammi fyrir og það er allavega eitthvað sem við Píratar leggjum mikla áherslu á í samgöngu-og skipulagsmálunum sem hún Sigurborg Ósk, sem er annar borgarfulltrúi Pírata, mun standa fyrir og leiða þannig að það ég held að það verði það fyrst sem við munum leggjast almennilega yfir.“

Þá er skaðaminnkun, lýðræðis-og gagnsæismál ofarlega á blaði þegar kemur að forgangsröðun. „Við ætlum að halda áfram opnun bókhaldsins. Við ætlum að hafa meira samráð við borgarbúa í allri ákvarðanatöku, stefnumótun og framfylgd stefnu. Það er lögbundið þegar það kemur að fötluðu fólki en það er líka eitthvað sem á við um öll mál,“ segir Dóra Björt.

Samræðustjórnmál í öndvegi

Meirihlutinn sem var kynntur í dag er þó afar tæpur og ljóst er að lítið má út af bera í meirihlutasamstarfinu. Aðspurð, segir Dóra Björt að flokkarnir ætli að leggja áherslu á góð samskipti og munu reiða sig á vinnulag sem hefur verið við lýði hjá fráfarandi meirihluta.

„Það þýðir líka bara að það sé gott og mikilvægt að eiga í góðu samtali við minnihlutann og reyna að finna einhvers konar grundvöll sem við getum öll lifað við að mörgu leyti þannig að ég lít á þetta sem ákveðið tækifæri,“ segir Dóra Björt og vitnar til samræðustjórnmálanna sem hún nefndi fyrr í viðtalinu.

Segir að allir ættu að geta blómstrað í starfi

„Ég held við höfum öll náð að koma inn okkar kjarnamálum og ég held að við munum öll geta vel við unað. Við höfum skipt embættunum þannig að allir eiga að geta blómstrað í sínu starfi og sýnt fram á að þeir eru traustsins verðir og ég tel okkur öll koma mjög heil að því og við styðjum hvort annað í því,“ segir Dóra Björt sem auk þess að gegna embætti forseta bæjarstjórnar mun fara fyrir mannréttinda-og lýðræðisráði.