Hvergerðingar flykkjast í hlaupahóp til minningar um Mikael Rúnar

Mikill samhugur er í Hveragerði þessa dagana í aðdraganda Reykjavíkurmaraþonsins. Heimamenn eru byrjaðir að klæða sig í íþróttagallann og reima á sig hlaupaskóna því til stendur að hlaupa til minningar um Mikael Rúnar Jónsson, ungan Hvergerðing, sem lést af slysförum í apríl í fyrra.

Foreldrar hans hafa hrundið af stað söfnun fyrir Birtu landssamtök sem styðja forráðamenn og foreldra sem misst hafa börn og ungmenni fyrirvaralaust. Þau eru miklir hlauparar en frumkvæði þeirra hefur fengið ólíklegasta fólk til að bætast í hópinn.

Heimir Eyvindarson og Matthea Sigurðardóttir mættu í Bítið á Bylgjunni í morgun og sögðu frá framtakinu.

„Það eru 32 komnir í þennan hóp,“ segir Heimir sem getið hefur sér gott orð sem tónlistarmaður en lítið hefur sést til hans á hlaupum, fyrr en nýlega.

„Þú ert í yfirþyngd bak við skrifborð og svo er bara búið að skrá þig í einhvern hlaupahóp. Þú ert að fara að hlaupa tíu kílómetra.“

Heimir er búinn að kaupa sér hlaupaskó og greinilega fleiri en þau Matthea sem tóku kallinu fagnandi. Góð stemmning hefur myndast í kringum hópinn.

„Það er mjög hvetjandi. Ég veit um mjög marga sem, þegar þetta lá fyrir, hafa sett app í símann sinn og farið nánast daglega til að hreyfa sig. Þetta er mjög hvetjandi og gaman að standa saman. Finna liðsheildina.“

Viðtalið í heild má heyra hér að neðan.

Rosalegt högg fyrir samfélagið

Langflestir í hópnum eru Hvergerðingar.

„Að stórum hluta eru þetta Hvergerðingar. Þetta eru fjölskylda og vinir. Líka hluti af hlaupahóp Hamars sem foreldrarnir hafa verið hluti af. En líka ættingjar annars staðar frá,“ segir Matthea.

Heimir og Matthea eru sannfærð um að fjölga muni í hópnum sem nú þegar hefur safnað tæplega 600 þúsund krónum af 800 þúsund króna markmiði sínu.

„Þetta var rosalegt högg fyrir samfélagið. Þetta er 2300 manna samfélag og það þekkjast allir. Þetta var rosalegur skellur fyrir alla og gríðarlega sorglegt. Hann var lífsglaður, glæsilegur og skemmtilegur strákur. Þetta var hræðilegt,“ segir Heimir um áfallið sem dundi yfir.

„Með fullri virðingu fyrir öllum áföllum þá er þetta örugglega það versta sem þú lendir í.“

Styðja við bakið á foreldrum í sorg

Foreldrarnir Þorbjörg Elva Óskarsdóttir og Jón Gísli Guðlaugsson eru efstir í hópnum sem stendur. Elín Hrönn Jónsdóttir, Heimir og Matthea fylgja fast á hæla þeirra. Þeir sem vilja hlaupa til minningar um Mikael Rúnar geta bæst í hópinn. Fyrst þarf að skrá sig í hlaupið og svo er hægt að skrá sig í hópinn, númer 2056, á hlaupastyrkur.is. Þá má hringja í styrktarnúmerin 901-1000, 901-2000 eða 901-5000 til að styrkja um tilsvarandi upphæð.

Matthea segir hópinn ætla að vera í merktum bolum og Heimir bætir við að það verði partý um kvöldið. Það hafi verið það fyrsta sem hann pældi í, grínast hann með. Hann hafi haft sérstaklega gott af því að fara að hlaupa, sé kominn með hlaupaskó og þetta sé tækifæri til að hugsa um heilsuna.

Birta Landssamtök voru stofnuð árið 2012 til að styðja við bak forráðamanna og foreldra í sorg sinni. Stuðningurinn er meðal annars í formi opinna hús og fræðslukvölda að sögn Mattheu. Auk þess eru árlegir hvíldardagar með endurnærandi hvíld að leiðarljós.

„Ég veit að Elva og Jónsi vilja gefa samtökunum til baka með þessu framtaki,“ segir Matthea.

Tæplega 16 milljónir hafa safnast til styrktar ýmsum málefnum í aðdraganda Reykjavíkurmaraþonsins í ár. Hlaupið verður þann 18. ágúst.

Hægt er að kynna sér Birtu landssamtök á heimasíðu samtakanna.Nánar um söfnunina á Hlaupastyrkur.is.