Bað hvítt fólk um að líta í eigin barm eftir að svartur unglingur var stunginn til bana

Bandaríska leikkonan Anne Hathaway hvatti hvítt fólk til að líta í eigin barm og átta sig á skelfilegum raunveruleika sem svart fólk í Bandaríkjunum býr við á hverjum degi. Hathaway vakti athygli á kynþáttahatri í Bandaríkjunum í færslu á Instagram-reikningi sínum til minningar um svarta stúlku sem stungin var til bana á sunnudag.

Nia Wilson var á leið heim úr fjölskylduboði með systur sinni í borginni Oakland í Kaliforníu þegar henni var ráðinn bani. Hvítur karlmaður, John Lee Cowell, er í haldi lögreglu grunaður um verknaðinn. Ekki er ljóst hvort árásin hafi verið framin á grundvelli kynþáttahaturs.

Hathaway minntist Wilson á Instagram-reikningi sínum í vikunni og biðlaði til alls hvíts fólks að hugsa sinn gang.

„Hvítt fólk, þar á meðal ég og þú, verðum að taka það til okkar að allt svart fólk býr við lamandi ótta um líf sitt í Bandaríkjunum og sú hefur verið raunin í margar kynslóðir,“ skrifaði Hathaway. Þá hvatti hún hvítt fólk jafnframt til að vera meðvitað um forréttindi sín og líta gagnrýnum augum á gjörðir sínar.

„Hversu „almennileg“ erum við í raun og veru? Ekki í ásetningi okkar heldur í gjörðum okkar? Í aðgerðarleysi okkar?“

Hathaway tjáir sig reglulega um málefni er varða mannréttindi á Instagram-reikningi sínum. Hún hefur til að mynda birt færslur til stuðnings baráttu hinseginfólks og hertri byssulöggjöf í Bandaríkjunum.