Logi segir embætti Kjærsgaard ekki gefa henni fjarvistarsönnun frá skoðunum hennar

Formaður Samfylkingarinnar er ekki sáttur við stefnubreytingu danskra jafnaðarmanna í útlendingamálum sem beri keim af því að flokkurinn sé að reyna að ná sér í skammtíma vinsældir. Það gefi Piu Kjærsgaard hins vegar ekki fjarvistarsönnun frá skoðunum hennar að gegna embætti forseta danska þingsins.

Jón Þór Ólafsson fulltrúi Pírata í forsætisnefnd Alþingis hefur óskað eftir því skriflega að fá allar upplýsingar um hvernig það var ákveðið að Pia Kjærsgaard forseti danska þingsins skyldi ávarpa hátíðarfund Alþingis á Þingvöllum, sem Píratar ákváðu að hundsa vegna nærveru hennar. Hún gerði lítið úr þessum aðgerðum Pírata og mótmælum formanns og þingmanns Samfylkingarinnar í fréttum okkar í gær.

„En ef menn vilja endilega ræða þessi mál gæti verið að sósíaldemókratar á Íslandi ættu að kynna sér stefnu systurflokka víða um Evrópu og einnig í Danmörku,“ sagði Kjærsgaard meðal annars.

Logi Einarsson formaður Samfylkingarinnar segir mikilvægt að samstaða myndist um mannúðlega stefnu í innflytjenda- og flóttamannamálum í Evrópu.

„Ég hef tekið eftir því að hún er farin að skipta sér af því hvernig við störfum og hvernig við högum okkur og hefur jafnvel skoðun á því hvernig við erum alin upp. Staðreyndin er auðvitað sú að þetta var þingfundur. Við viljum auðvitað bara koma okkar sjónarmiðum á framfæri á 100 ára afmæli fullveldisins,“ segir Logi.

Hann þekki vel til nýlegrar stefnubreytingar danskra jafnaðarmanna í útlendingamálum undir formennsku Mette Frederiksen þar sem talað sé um gettó og jafnvel þyngri refsingar í hverfum þar sem aðrir en fólk af vestrænum uppruna búi.

„Hins vegar göngumst við náttúrlega ekki undir allt það sem systurflokkar okkar eða flokkar sem aðhyllast jafnaðarstefnuna í Evrópu gera,“ segir Logi. Mette Frederiksen hafi afhent honum eintak af þessari stefnu í febrúar og þá hafi hann gagnrýnt stefnubreytinguna.

„Ég er pínu hugsi yfir því ef flokkar ætla að hrekjast frá grunngildum jafnaðarstefnunnar í leit að auðfengnum atkvæðum,“ segir Logi.

Formaður Samfylkingarinnar segir erfitt að aðskilja stjórnmálamanninn Piu Kjærsgaard og forseta danska þingsins. Síðan sé engin hefð fyrir því að erlendir stjórnmálamenn ávarpi fundi Alþingis.

„Þú getur aldrei útilokað persónuna frá embættinu. Þrátt fyrir allt er hún komin í þetta embætti vegna sinnar stefnu, sinna skoðana, vegna hennar styrks í kosningum. Það gefur henni í rauninni ekki fjarvistarsönnun frá því að standa fyrir það sem hún stendur,“ segir Logi Einarsson.