Íranar halda áfram að uppfylla kjarnorkusamninginn

Alþjóðakjarnorkustofnunin segir að Íranar haldi áfram að uppfylla skilyrði kjarnorkusamnings þeirra við heimsveldin þrátt fyrir að Bandaríkin hafi dregið sig út úr honum. Eftirlitsmenn hafi fengið aðgang að öllum þeim stöðum sem þeir þurftu að rannsaka.

Í ársfjórðungsskýrslu stofnunarinnar kemur fram að Íranar hafi haldið sig innan takmarkana á auðgun úrans og geymslu á efnum sem hægt væri að nota til að framleiða kjarnavopn sem kveðið er á um í kjarnorkusamninginum frá árinu 2015.

Bandaríkin drógu sig einhliða út úr samningnum maí að skipan Donalds Trump forseta. Þjóðverjar, Bretar, Frakkar, Rússar og Kínverjar hafa hins vegar reynt að bjarga samningnum.

Kjarnorkusamningurinn þótti sögulegur þegar hann var undirritaður árið 2015. Með honum féllust írönsk stjórnvöld á að takmarka kjarnorkuþróun sína gegn því að heimsveldin felldu niður refsiaðgerðir sem höfðu verið dragbítur á efnahagi landsins.

Bandarísk stjórnvöld hafa hins vegar aftur lagt refsiaðgerðir á Íran sem eru þegar byrjaðar að sliga efnahaginn. Íranski gjaldmiðillinn hefur hrunið í verði að undanförnu, að sögn AP-fréttastofunnar.