Glæsilegur sigur hjá ÍBV

Handbolti Eyjamenn voru hársbreidd frá því að komast í úrslit Áskorendabikars Evrópu á síðasta tímabili. Byrjunin í EHF-bikarnum á þessu tímabili var heldur ekkert slor. Í gær unnu Íslands-, bikar- og deildarmeistarar ÍBV franska liðið Pays d’Aix með eins marks mun, 24-23, í fyrri leiknum í 2. umferð keppninnar.

Kolbeinn Aron Ingibjargarson sá til þess að Eyjamenn fara með eins marks forskot í seinni leikinn í Frakklandi um næstu helgi en hann varði lokaskot franska liðsins. Kolbeinn, sem sneri aftur til ÍBV í sumar eftir eitt ár í herbúðum Aftureldingar, varði alls 18 skot og átti afbragðsgóðan leik.

Framlag Theodórs Sigurbjörnssonar á lokakaflanum vóg einnig þungt en hann skoraði tvö síðustu mörk ÍBV í leiknum. Hann gerði alls fjögur mörk.

Skytturnar Sigurbergur Sveinsson og Kristján Örn Kristjánsson drógu vagninn í sóknarleik ÍBV í fyrri hálfleik. Þeir skoruðu samtals níu af tíu mörkum Eyjamanna sem voru undir, 10-12, þegar liðin gengu til búningsherbergja. Heimamenn máttu vera ósáttir við þá stöðu enda búnir að fara illa með mörg góð færi.

ÍBV byrjaði seinni hálfleikinn af miklum krafti, skoraði átta af fyrstu ellefu mörkum hans og náðu þriggja marka forskoti, 18-15. Frakkarnir svöruðu með fjórum mörkum í röð og náðu forystunni á ný, 18-19. Lokamínúturnar voru gríðarlega spennandi en Eyjamenn sýndu styrk og lönduðu sigrinum.

Lið Pays d’Aix er mjög sterkt en það endaði í 5. sæti frönsku úrvalsdeildarinnar á síðasta tímabili. Þjálfari liðsins er goðsögnin Jérome Fernandez sem vann allt sem hægt var að vinna með franska landsliðinu á sínum tíma.

ÍBV hefur núna unnið sjö af síðustu níu Evrópuleikjum sínum, gert eitt jafntefli og aðeins tapað einum leik.

Eyjamanna bíður erfitt verkefni í Aix um næstu helgi en frammistaðan í fyrri leiknum í gær hlýtur að gefa þeim byr undir báða vængi.