Létust vera kommúnistar til að sverta andstæðinginn

Tveir félagar í Repúblikanaflokknum í Arizona í Bandaríkjunum eru sagðir hafa reynt að gefa framboði þingmanns demókrata fé í nafni samtaka kommúnista. Uppátækið virðist hafa verið tilraun til þess að bendla þingmanninn við vinstriöfgahópa.

Starfsmenn framboðs Toms O‘Halleran, fulltrúadeildarþingmanns demókrata, fylltust fljótt grunsemdum þegar tveir menn mættu á skrifstofu þess og vildu styrkja framboðið um tæpa fjörutíu dollar.

Þegar þeir voru beðnir um að fylla út eyðublað sögðust þeir vera félagar í Kommúnistaflokki Háskóla Norður-Arizona. Það væri ekki fullgildur flokkur en hópurinn héldi úti fundum. Kröfðust þess þeir einnig að fá kvittun fyrir framlaginu. Þegar þeim var sagt að þeir fengju aðeins kvittun í tölvupósti þurrkaði annar þeirra út tölvupóstfang sem hann hafði sett á blað og skrifaði annað í þess stað, að sögn The Guardian.

Fjármálastjóri framboðsins heimsótti í kjölfarið skrifstofu Repúblikanaflokksins til þess að skila fénu. Þar tók á móti honum annar meintu kommúnistanna. Fjármálastjórinn heldur því fram að hinn maðurinn sé skipuleggjandi fyrir Repúblikanaflokkinn í Arizona og að hann hafi gefið upp rangt nafn. Ólöglegt er að gefa fé til bandarískra stjórnmálaframboða undir fölsku flaggi.

Hvorki Repúblikanaflokkurinn í Arizona né Wendy Rogers, frambjóðandi hans til þingkosninga sem fara fram í byrjun nóvember, vildu tjá sig um uppákomuna.