Gul viðvörun um allt land: Biðlað til ferðalanga að fylgjast vel með veðurspám

Gul viðvörun er í gildi vegna veðurs um allt Ísland, að undanskildu Suðurlandi. Veðurstofan segir að í gær hafi veðurspár breyst hratt og slíkt geti gerst í dag. Eru því ferðalangar, sem og aðrir, beðnir um að fyljgast sérstaklega vel með veðurspám fyrir kvöldið og nóttina.

Þetta gildir einkum fyrir þá sem eru á norðanverðu landinu eða hyggjast ferðast þangað að því er kemur fram í hugleiðingum veðurfræðings á vef Veðurstofu Íslands. Gula viðvörunin er í gildi frá hádegi í dag og fram eftir nóttu.

Þar segir að með morgninum sé vaxandi suðvestlæg átt og upp úr hádegi megi búast við hvassviðri eða stormi víða um land með skúrum sunnan og vestan til, en létti til um landið norðaustanvert. Í kvöld bæti í vindinn og útlit sé fyrir að hviður geti farið upp í um 40 metra á sekúndu á norður- og norðaustanverðu landinu.

Í suðvestanáttinni eru svo ákveðnir staðir sem finna meira fyrir veðurhæðinni en aðrir og má þar nefna Skagafjörð, Eyjafjörð og jafnvel í kringum Smjörfjöll á austanverðu landinu en á morgun fer að draga úr vindi og kólna.

Veðurhorfur á landinu

Snýst í hvassa suðvestanátt með morgninum, en 15-23 m/s eftir hádegi, hvassast á NV- og V-landi. Víða skúrir eða rigning, en léttir til NA-lands síðdegis. Bætir frekar í vind seint í kvöld og geta hviður þá farið í allt að 40 m/s við fjöll á N- og NA-landi. Hiti 2 til 8 stig.

Dregur úr vindi þegar líður á morgundaginn, fyrst á Vestfjörðum, víða suðvestlæg átt 8-13 m/s síðdegis. Kólnandi veður með skúrum eða éljum, en úrkomulítið A-ast.

Veðurhorfur á landinu næstu daga

Á sunnudag:

Suðvestan 13-23 m/s í fyrstu, hvassast norðantil. Dregur úr vindi þegar líður á daginn, suðvestlæg átt 8-13 m/s undir kvöld. Skúrir eða él, en úrkomulítið A-ast. Hiti 1 til 6 stig.

Á mánudag:

Vestan 5-13 m/s og rigning með köflum, en þurrt að mestu á N- og A-landi. Hiti 1 til 8 stig, mildast syðst.

Á þriðjudag:

Breytileg átt 5-13 m/s og þurrt í fyrstu, en rigning sunnanlands eftir hádegi og N-til um kvöldið. Hlýnandi veður, hiti 2 til 10 stig.

Á miðvikudag:

Gengur í stífa suðvestanátt með vætu V-lands, en þurrt um landið A-vert. Kólnandi veður.

Á fimmtudag og föstudag:

Útlit fyrir norðlæga átt með éljum fyrir norðan, en bjart með köflum sunnantil. Hiti víða nálægt frostmarki.