Sýknaður af því að hafa hótað fjölskyldu hefndaraðgerðum í strætó

Landsréttur hefur sýknað Kúrda af því að hafa hótað flóttafjölskyldu sem hann kom ólöglega hingað til lands því að þau þyrftu að breyta framburði sínum hjá lögreglu vegna yfirvofandi fangelsivistar mannsins. Hótunin var sögð hafa átt sér er stað er maðurinn hitti fjölskylduna fyrir tilviljun í strætó í Reykjavík.

Héraðsdómur Reykjaness dæmdi í málinu í janúar en þá var maðurinn sakfelldur fyrir að hafa skipulagt og aðstoðað fjögurra manna fjölskyldu og samlanda mannsins við að koma ólöglega hingað til lands á síðasta ári. Var hann einnig sakfelldur fyrir að hafa hótað fjölskyldunni í strætó en var manninum gefið að sök að hafa þrýst á að fjölskyldan breytti framburði sínum honum til stuðnings þar sem hann hafi verið handtekinn fyrir að hafa aðstoðað þau við að koma hingað til lands.

Handtekinn á leið frá landi

Forsaga málsins er sú að maðurinn var handtekinn þann 15. september 2017 er hann var á leið frá landinu eftir að hafa komið með fjölskylduna í flugi frá Kaupmannahöfn tveimur dögum áður. Í tösku hans fundust þýsk kennivottorð flóttamanna, leikföng og fatnaðar en skilríkin voru á nöfnum foreldranna í flóttamannafjölskyldunni sem um ræðir í málinu.

Þegar lögregla ræddi við fjölskylduna sögðust þau hafa sótt um hæli í Þýskalandi en fengið synjun. Þau hafi því ákveðið að greiða aðila fé fyrir að fara til Írlands með viðkomu á Íslandi. Annar maður hafi svo fylgt þeim til Íslands. Við skýrslutöku hjá lögreglu sagðist maðurinn ekki þekkja fjölskylduna, hann hafi aðeins verið að aðstoða þau að beiðni vinar hans.

Var maðurinn sakfelldur í héraðsdómi fyrir að hafa brotið útlendingalög með því að smygla fjölskyldunni hingað til lands ogstaðfesti Landsréttur þann dóm héraðsdóms á föstudaginn.

Sagður hafa hótað fjölskyldunni hefndaraðgerðum í Þýskalandi

Maðurinn var sem fyrr segir einnig gefið að sök að hafa hótað fjölskyldunni í strætó. Ólíkar sögur voru hins vegar sagðar af því atviki í héraðsdómi en fjölskyldufaðirinn sagði að maðurinn hefði sagt þeim að hann ætti von á sex ára fangelsisdómi fyrir að hafa aðstoðað fjölskylduna við að koma til Íslands. Sagði fjölskyldufaðurinn að maðurinn hefði sagt þeim að þau yrðu að breyta framburði sínum á þá leið að þau þekktu ekkert til mannsins og hefðu aldrei hitt hann. Ef það yrði ekki gert mættu þau eiga von á hefndaraðgerðum.

Var maðurinn sagður hafa sagt að fingraför þeirra væru á skrá í Þýskalandi og hægt yrði að hafa uppi á þeim þegar þau yrðu send til baka og ná þannig fram hefndum. Greindu þau talsmanni sínum frá samtalinu við manninn og hafði talsmaðurinn samband við lögregluna á Suðurnesjum í kjölfarið.

Sakfelldur í héraði en sýknaður í Landsrétti

Saga mannsins af samskiptunum í strætisvagninum var hins vegar á allt aðra leið. Samskipti þeirra hafi verið vinsamleg og það væri af og frá að hann hafi haft í hótunum við fjölskylduna. Við mat á ákæruliðunum sem tengdust hinum meintu hótunum leit Héraðsdómur til þess að lögreglumaður og talsmaður fjölskyldunnar hafi borið því við að faðirinn og móðirin hafi virst óttaslegin er þau ræddu um samskiptin við manninn í strætisvagninu. Var maðurinn því sakfelldur fyrir að hafa haft í hótunum við fjölskylduna. Var maðurinn dæmdur í níu mánaða fangelsi, þar af voru sex skilorðsbundnir.

Landsréttur sýknaði manninn hins vegar af hótununum í strætisvagninum en í dómi Landsréttar segir að miðað við framburð konunnar sem og samferðamanns hins ákærða sé ekkert sem renni stoðum undir það að maðurinn hafi haft í hótunum við fjölskylduna í strætisvagninum. Var það að auki rökstudd með tilliti til myndskeiðs úr strætisvagninum þar sem maðurinn sést ekki sýna af sér ógnandi tilburði né sýni faðirinn og móðirin ótta, hvorki á meðan á samtalinu stóð né eftir að maðurinn hafði

yfirgefið vagninn.

Var maðurinn því dæmdur í fimm mánaða fangelsi fyrir að hafa staðið ólöglega að komu fjölskyldunnar hingað til lands en þar af eru tveir mánuðir skilorðsbundnir.

Dóm Landsréttar má lesa her.